Şəhid Mirzəyev Elyar Cəlal oğlu 1984-cü il senytabrın 6-da Beyləqan rayonunun Bahar qəsəbəsində dünyaya gəlib. O, 1990-cı ilə Sərdar İmrəliyev adına Bahar tam orta məktbin 1-ci sinfinə daxil olub. Uşaqlıqdan futbola xüsusi marağı və həvəsi olan Elyar oxuduğu illər ərzində Bahar futbol komandasında çıxış edib. Elyarın kapitanı olduğu komanda məktəblilər arasında keçirilən çempionatlarda birincilik qazanıb. 2001-ci ildə məktəbi bitirən Elyar artıq professional futbolçu kimi tək Beyləqanda yox, ölkə futbolunda da tanınan sima idi. O, bir neçə futbol klubundan təklif alsa da, hərbi xidmətə getməyi seçib.
2002-ci ilin oktyabrın 10-da Beyləqan rayon hərbi komissarlığı tərəfindən həqiqi hərbi xidmətə çağırılan Elyar Ədliyyə Nazirliyinin Penitensiar xidmətində hərbi xidmətdə olub. Əsgər Mirzəyev xidməti ərzində də futboldan ayrılmayıb. O, Ədliyyə nazirliyinin “Ədliyyə” futbol klubunda futbolu davam etdirib. Hərbi xidməti başa vurduqdan sonra 2004-cü ilin aprelindən Bakının “Bakılı” futbol klubunda çıxış edib. Sonra ailə qurması ilə əlaqədar olaraq rayona qayıdıb xırda bizneslə məşğul olan Elyar həm də Beyləqanın “Mil” komandasında futbol oynayıb. O, 2006-2007-ci illərdə “Mil” futbol klubunun tərkibində Respublika Həvəskarlar liqasında Azərbaycan çempionu olub, eyni zamanda ölkə kubokunu qazanıb. Bir müddətdən sonra yenidən Bakıya qayıdıb “EKOL” MFK-da (mini futbol klubu) məşqlər keçib sonra yenidən rayona gəlib.
2016-cı ildə isə ailə üzvlərinə xəbər vermədən sənədlərini “Müddətdən artıq həqiqi hərbi xidmət hərbi qulluqçularının hazırlığı” kursuna verib. Kursu uğurla bitirərək Beyləqan rayonunda yerləşən “N” saylı hərbi hissənin “Həmlə” taborunda pulemyotçu kimi xidmətə başlayıb. Yaxınlarının sözlərinə görə, Elyarın hərb sənətinə uşaqlıqdan xüsusi marağı olub. Lakin o, ailənin yeganə övladı olduğuna görə, hərbçi olmaq istəyinə valideynlərinin verəcəyi reaksiyadan çəkinib və buna görə də bu barədə ailəsinə işə başladıqdan sonra məlumat verib. Elyar qısa müddət ərzində peşəkar hərbçi kimi formalaşıb dəfələrlə fəxri fərman və təşəkkürnamələrə layiq görülüb. Xidməti dövründə də futbol karyerasını davam etdirən Elyar 2019-cu ildə Gəncədə keçirilən Azərbaycan Silahlı Qüvvələrinin futbol üzrə ordu çempionatında ikinci ordu korpusunun komandası tərkibində ordu çempionu olub.
2020-ci ilin 27 sentyabrından başlayan Vətən müharibəsində Elyarın döyüş yolu cəbhənin Füzuli istiqamətindən başlayıb. Təmsil olduğu “Həmlə” taborunun tərkibində döyüşlərə qatılan Elyar elə ilk günlərdən xüsusi qəhrəmanlıqları ilə fərqlənib. O, müharibənin birinci günündə düşmənin illərlə möhkəmləndiyi “Ohanyan” xətti adlandırılan istehkamı keçib bir neçə kəndin işğaldan azad edilməsində iştirak edib. Həmin vaxtlar ailəsi ilə əlaqə saxlamağı da unutmur, onlara zəng vurub ürək-dirək verir, hər şeyin yaxşı olacağını deyirmiş. Füzuli, Cəbrayıl və Hadrut istiqamətində gedən döyüşlərin fəal iştirakçısı olan Elyar pulemyotçu kimi işinin öhdəsindən peşəkarlıqla gəlmiş, düşmənə göz açmağa aman verməmişdir. O, dəfələrlə özünü təhlükəyə ataraq, döyüş anında atəş altında qalan yaralı yoldaşlarını qorxmadan, igidcəsinə xilas edib. Daim düşmənin hədəfində olan qəhrəman pulemyotçumuz oktyabrın 14-də səhər saatlarında Hadrut istiqamətində yerləşən Şaban dağının ətəklərində başlayan açıq döyüşdə snayper gülləsinə tuş gələrək şəhidlik zirvəsinə ucalıb. Elyar oktyabrın 16-da Bahar qəsəbəsində uğrunda canını fəda etdiyi vətən torpağına tapşırılıb.
Elyar ailəli idi: oğlu Əşrəf 2005-ci ilin iyulun 21-də, futbolçu olub atasının yolunu davam etdirmək istəyən qızı Xanım isə 2006-cı ilin noyabrın 3-də anadan olub.
İgidliyi ilə adını vətən tariximizin şanlı səhifəsinə əbədi yazan əsgər Mirzəyev Elyar Cəlal oğlu ölümündən sonra iştirak etdiyi döyüş əməliyyatlarında və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə görə Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin sərəncamları ilə “Vətən uğrunda”, “Cəbrayılın azad olunmasına görə” və “Füzulinin azad olunmasına görə” medalları ilə təltif edilib.
Ramil Hikmət
