image-sadman-huseyn-4backend

Arzuları və əməlləri yarımçıq qalmış İNSAN!

image-ads_728x90

Azərbaycanın qədim yurdlarından olan Vedi mahalı milli tariximizin bütün dövrlərində sayılıb seçilən övladları ilə şöhrət tapmışdır. Vedinin sayılan övladlarından biri əslən Şirazlı kəndindən “Pəhləvan” ləqəbi ilə tanınan Bəhlul Hüseyn oglu Əhmədov olmuşdur. Bəhlul kişinin babası Cənubi Azərbaycanın Şiraz mahalından şah rejiminə qarşı mübarizənin fəal iştirakçısı olmuş, Şimali Azərbaycan Çar Rusiyası tərəfindən işğal edildikdən sonra isə Araz çayı sahilinə köçərək Şirazlı kəndinin ilk sakinlərindən biri olmuşlar. Bəhlulun atası Hüseyn kişi yalnız Vedi mahalında deyil bölgədə bacarıqlı bənna kimi şöhrət qazanmışdır.

Keçən əsrin 90-cı illərinə qədər onun inşa etdiyi məscidin qalıqları Türkiyənin İqdır vilayətinin Orta köyündə qalmaqda idi. Usta Hüseynin dörd oğlu və iki qız övladı olmuşdur. 1918-ci il erməni-türk münaqişələri zamanı Hüseyn kişinin övladları didərgin düşmüşlər. Amansız tale Bəhlul kişini və qardaşı Cabbarı digər bacı və qardaşlarından ayrı salmış və onlar Gəncədə məskunlaşmışlar. Digər iki qardaş və bir bacı Türkiyədə, bir bacı isə Cənubi Azərbaycana sığınmışlar. Bəhlul kişinin yeddi oğlan və dörd qız övladı olmuşdur. Onun böyük oglu Heydər Vedinin ilk ziyalılarından biri, Şirazlı məktəbinin ilk direktoru və Azərbaycan dili və ədəbiyyatı müəllimi olmuşdur. O, ikinci dünya müharibəsində də iştirak etmişdir.

Heydər müəllimin üç bacısı oglu Azərbaycan Milli Ordusunda zabit olmuş, bir bacısının nəvəsi Həsənli Müşviq Vüqar oğlu İkinci Qarabağ müharibəsində zabit olaraq iştirak etmiş, Qarabağın ermələrdən azad edilməsində qəhrəmanlıqlar göstərmişdir. Onun xidmətləri Ali Baş Komandan tərəfindən dörd medalla qiymətləndirilmişdi.

Ailənin sonbeşiyi isə Şadman olmuşdur. Şadman orta məktəbi bitirdikdən sonra Rusiyanın Saratov şəhərində tibb institutunu uğurla başa vurmuş, hərbi xidmət dövrünü yekunlaşdırdıqdan sonra isə Gəncə şəhərində Birləşmiş Dəmir Yolu Xəstəxanasda həkim kimi fəaliyyətə başlamışdır. Qısa müddətə – 32 yaşında baş həkim vəzifəsinə təyin edilmişdir.

Onun 1988-ci il deportasiyası zamanı Qərbi Azərbaycandan qovulmuş soydaşlarımızın qarşılanmasında, onların məskunlaşmasında müstəsna xidmətləri olmuşdur.

1990-cı ildə keçirilən parlament seçkilərində Şadman Hüseyn seçkilərdə qalib gəlmiş və parlamentın ilk üzvlərindən biri olmuşdur.

Azərbaycannın Dövlət Müstəqilliyi Aktına imza atan 43 nəfər deputatdan biridir. O, Azərbaycanı Avropa Şurasında təmsil edən deputat qrupunun ən fəal üzvlərindən biri idi. Azərbaycan Respublikasının Avropa Şurasına üzv kimi qəbul olunmasında onun müstəsna xidmətləri danılmazdır. O, bütün çıxışlarında Azərbaycanın mövcud problemlərini beynəlxalq tribunadan dünya ictimaiyyətinin nəzərinə çatdırmağa çalışırdı.

2002-ci ildə Şadman Hüseynin rəhbərliyi ilə bir qrup Qərbi Azərbaycan əslli tanınmış ziyalılar “Qərbi Azərbaycan Beynəlxalq Cəmiyyəti” adlı hərəkat yaratdığını elan edildi. Ulu öndər Heydər Əliyev bu addımı yüksək qiymətləndirmiş və ona xüsusi önəm verdiyini bildirmişdir. Cəmiyyətin yaradılması məqsədilə Azərbaycannın bütün bölgələrində məskunlaşmış qərbi azərbaycanlıların qeydiyyatı aparılmış, Ermənistan ərazisində qalmış daşınmaz əmlakların təxmini qiymətləndirilməsi həyata keçirilmişdir. Məqsəd gələcəkdə beynəlxalq təşkilatlar qarşısında Ermənistan hökümətindən 50 milyard dəyərində maddi təzminatın tələb olunması idi.
Təəssüf ki, 2003-cü il avqustun 5-də amansız və vaxtsız ölüm Şadman Hüseyni aramızdan apardı.

Onun saysız arzuları və əməlləri yarımçıq qaldı.

Sevindirici və qürürverici haldır ki, Ali Baş Komandan, cənab İlham Əliyev ikinci Qarabag müharibəsində işgalda olan torpaqlarımızı müzəffər ordumuzla azad etdi.

Qədim Azərbaycan torpaqları olan Qərbi Azərbaycanın geri qaytarılması üçün məqsədyönlü dövlət siyasətinin tərkib hissəsi olaraq Qərbi Azərbaycan İcmasının yaradılması cənab Prezidentin son illərdə həyata keçirdiyi siyasətin ən ugurlu nümunələrindən biridir.

Bu gün Qərbi Azərbaycan İcması dünyanın ən mühüm beynəlxalq ictimai-siyasi təşkiları qarşısında Azərbaycannın haqq səsinin ucaldılmasında öz üzərinə düşən vəzifələri ləyaqətlə yerinə yetirir. Bu bir daha Prezident İlham Əliyevin yürütdüyü ugurli daxili və xarici siyasətin bariz nümunəsidir.

Asim Səfərov

image-sadman-huseyn-3 image-sadman-huseyn-2 image-sadman-huseyn-1

image-shadman-huseyn_heyder-aliyev

image-ads_728x90

  • whatsapp
  • messenger
  • telegram
  • vkontakte
  • odnoklassniki