Türkiyənin paytaxtı Ankarada Türk Dövlətləri Təşkilatına üzv ölkələrin tarix və arxeologiya institutlarının direktorlarını və müşahidəçilərini, aparıcı tarixçi və ekspertləri bir araya gətirən Türk Ölkələrinin Tarixi Seminarı keçirilib. Ekspertlər və alimlər sözügedən akademik tədqiqatın konseptual çərçivəsini müzakirə ediblər.
Beynəlxalq Türk Akademiyasından Alp.az-a verilən məlumata görə, Türk Dövlətləri Təşkilatının 2024-cü il noyabrın 6-da Bişkekdə keçirilən XI Qurultayında türk ölkələrinin ortaq tarixinin hazırlanması ideyası irəli sürülüb. Bu irimiqyaslı layihəyə cavabdeh qurum kimi Türk Akademiyası müəyyən edilib.
Türk Tarix Qurumunun Ankaradakı Bilkənd Universitetində keçirilən toplantısında Türk Akademiyasının prezidenti Şahin Mustafayev, Türk Dövlətləri Təşkilatı Ağsaqqallar Şurasının sədri Binəli Yıldırım, Atatürk Mədəniyyəti, Dil və Tarixi Ali Şurasının sədri Derya Örs və Türkiyə Tarix Qurumunun sədri Yüksel Özgen iştirak ediblər.
İclası giriş sözü ilə açan Türk Akademiyasının prezidenti Şahin Mustafayev layihənin həyata keçirilməsində göstərdikləri fəal köməyə görə bütün iştirakçılara təşəkkürünü bildirib və komanda işinin vacibliyini vurğulayıb: “Bir ölkənin tarixi ilə bağlı araşdırma yazmaq belə asan məsələ deyil. Bizim işimiz daha çətindir. Həqiqətən də bizim borcumuz qardaş xalqlarımızın və ölkələrinin bütöv tarixini yazmaqdır”.
Akademiyanın prezidenti çıxışında ilk addım kimi iştirakçıların sözügedən monoqrafiyanın konseptual çərçivəsini müəyyən etməli olduğunu vurğulayıb və tədqiqatın akademik dərinliyi ilə əlçatan olmasını təmin etməyin vacibliyinə diqqəti çəkib. Başqa sözlə, tədqiqat təkcə elmi deyil, həm də geniş auditoriya, o cümlədən tələbələr və gənc tədqiqatçılar üçün başa düşülən olmalıdır.
Yazılacaq monoqrafiyanın əsas məqsədləri türk dünyası tarixinin əsas mərhələlərini vurğulamaq, qardaş xalqlarda ortaq tarixi şüur yaratmaq, xüsusilə gənclərdə milli qürur hissini gücləndirmək, türk tarixi-mədəni irsini beynəlxalq aləmdə təbliğ etməkdir.
Görüşün nəticəsi olaraq Türk Akademiyasının prezidenti ilə tarix və arxeologiya institutlarının direktorları arasında türk ölkələri ilə bağlı tarixi monoqrafiyanın yazılması üzrə birgə işi nəzərdə tutan əməkdaşlıq protokolu imzalanıb.
