Bu gün şəhid Vüsal Abbasovun doğum günüdür.
Abbasov Vüsal Telman oğlu 1983-cü il avqust ayının 12-də Beyləqan rayonunun Təzəkənd kəndində anadan olub. O, 1989-cu ildə birinci sinfə gedib 2000-ci ildə Əliheydər Məmmədov adına Təzəkənd kənd tam orta məktəbini bitirib. Məktəbi bitirdikdən sonra başqa gənclər kimi bir müddət ata-anasına köməklik edib müddətli hərbi xidmət vaxtı çatanda isə 2001-ci ildə Beyləqan rayon hərbi komissarlığı tərəfindən həqiqi hərbi xidmətə çağırılıb.
O, Xızı rayonunda yerləşən “N” saylı hərbi hissədə topçu kimi xidmət edib. 2003-cü ildə hərbi xidmətini başa vuran Vüsal bir müddət müəyyən işlərdə çalışsa da, yenidən hərbi xidmətə qayıdıb. Sənədlərini “Müddətdən artıq həqiqi hərbi xidmət hərbi qulluqçularının hazırlığı” kursuna verib. Kursu uğurla bitirərək Beyləqan rayonunda yerləşən “N” saylı hərbi hissədə xidmətə başlayıb. Piyadanın Döyüş Maşınında (PDM-2) sürücü-mexanik olan Vüsal 2016-cı il aprel ayında Ermənistan-Azərbaycan qoşunlarının təmas xəttində-Lələtəpə istiqamətində gedən döyüşlərdə iştirak edib.
Vətən müharibəsində döyüş yolu Füzuli bölgəsindən başlayan qəhrəmanımız “PDM-2” ilə ona verilən tapşırıqların öhdəsindən ləyaqətlə gəlib. Yüksək idarəçilik qabiliyyətinə malik Vüsal düşmənin illərdir hazırladığı istehkamları keçib sürətlə irəliləyib düşmən tapdağında olan ərazilərimizin işğaldan azad olunmasında xüsusi fədakarlığı ilə seçilib. Döyüşlərin üçüncü günündə sentyabrın 29-da səhər saat 10 radələrində ailəsi ilə əlaqə saxlayaraq: “Hər şey yaxşıdır, arxayın olun, uşaqlardan muğayat olun, irəli gedirik” deyib. Növbəti gün sentyabrın 30-da ikinci eşalonun yarılmasından sonra toplanma məntəqəsinə sursat götürməyə gələn Vüsal günorta saat 14 radələrində yaxınlığına düşən minomyot mərmisindən qəlpə yarası alaraq şəhid olub. O, doğulub boya-başa çatdığı Təzəkənddə-uğrunda canını fəda etdiyi müqəddəs Vətən torpağına tapşırılıb.
Vüsal ailəli idi: Ümid və Cərcis adlı əkiz oğlu var.
İgidliyi ilə adını tariximizin şanlı səhifəsinə yazan əsgər Abbasov Vüsal Telman oğlu ölümündən sonra-iştirak etdiyi döyüş əməliyyatlarında və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə görə – Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin sərəncamları ilə “Vətən uğrunda” və “Füzulinin azad olunmasına görə” medalları ilə təltif edilib.
Ramil Hikmət
