Polşanın Krakov şəhərində tanınmış türkoloq-şərqşünas Sadıq bəy Ağabəyzadənin anadan olmasının 160 illiyinə həsr olunmuş beynəlxalq elmi tədbir və sərginin açılış mərasimi keçirilib.
Alp.az-ın məlumatına görə, beynəlxalq tədbirdə Polşa, Azərbaycan, Türkiyə və digər ölkələrin diplomatik missiyalarının nümayəndələri, türkoloqlar və şərqşünas alimlər iştirak ediblər.
Türk Akademiyasının prezidenti, professor Şahin Mustafayev çıxışında Sadıq bəy Ağabəyzadəni 19-cu əsrin sonu, 20-ci əsrin əvvəllərində yaşamış Azərbaycan türk ziyalıları nəslinin parlaq nümayəndəsi kimi təqdim edib. Bu nəslin cəmiyyətin müasirləşməsində, Şərq elminin və maarifçilik hərəkatının inkişafında mühüm rol oynadığını vurğulayan Ş.Mustafayev Sadıq bəyin elmi-mədəni irsinin türk və Avropa elm aləminin qarşılıqlı əlaqəsi kontekstində böyük əhəmiyyət kəsb etdiyini bildirib.
O, həmçinin Türk Akademiyasının görkəmli şəxsiyyətlərin irsinin tədqiqi və təbliğinə böyük önəm verdiyini, əsərlərinin yenidən nəşri, türk və dünya elminə verdiyi töhfələrin akademik səviyyədə qiymətləndirilməsi istiqamətində layihələr həyata keçirdiyini bildirib.
Elmi və mədəni əməkdaşlığın gücləndirilməsinin əlaməti olaraq Türk Akademiyasının prezidenti Şahin Mustafayev Sadıq bəy Ağabəyzadənin yenidən nəşr olunmuş “Türkmən ləhcəsi dərsliyi və Trans-Xəzər türkmənlərinin atalar sözləri və deyimlər toplusu” adlı əsərini Jagiellon Universitetinin Şərqşünaslıq İnstitutunun Kitabxanasına hədiyyə edib. Əsər ilk dəfə 1904-cü ildə Aşqabadda nəşr olunub və yazıçının anadan olmasının 160 illiyi münasibətilə Türk Akademiyası tərəfindən yenidən çap olunub. Bu kitab türkmən dilinin qrammatikasına dair ilk sistemli araşdırma olması və türk dilçilik ənənəsinin ən qiymətli mənbələrindən biri hesab edilməsi baxımından böyük əhəmiyyət kəsb edir. Bundan əlavə, Türkiyə Akademiyasının hazırladığı digər nəşrlər də həmin kitabxanaya hədiyyə edilib.
Seminardakı çıxışlarda Sadıq bəy Ağabəyzadənin şərqşünaslığın inkişafına verdiyi töhfələrdən, Azərbaycanın mədəni və elmi həyatındakı rolundan, köç prosesi zamanı keçdiyi həyat yolundan da geniş bəhs edilib.
Tədbirdə xatırlanıb ki, Sadıq bəy Ağabəyzadə general-mayor rütbəsi ilə Azərbaycan Xalq Cümhuriyyəti daxili işlər nazirinin müavini olub. Ömrünün əhəmiyyətli bir hissəsini Polşada keçirib və burada universitetdə şərq dilləri üzrə kurslar verib. Polşanın bir çox tanınmış türkoloqları onun tələbələri olublar. Ağabəyzadə 1944-cü ildə Lvovda vəfat edib.
Tədbir “Sadıq bəy (1865–1944) iki xalqın xidmətində” adlı sərgi ilə başa çatıb. Sərgi zəngin arxiv sənədləri və tanınmış şərqşünas alimin həyat və elmi irsindən ətraflı bəhs edən sənədləri ilə diqqəti cəlb edib.
