Bakıda Türk Akademiyasının apardığı genişmiqyaslı sosioloji araşdırmanın nəticələrinin təqdim olunduğu beynəlxalq konfrans keçirilib.
Alp.az-ın məlumatına görə, “Türk Barometri 2024: Türk Dövlətlərində Təhsil və Elmdə Əməkdaşlıq – Mövcud Vəziyyət və Gələcəyə Baxış” adlı tədbir Azərbaycan Sosial Araşdırmalar Mərkəzi ilə birgə təşkil olunub.
Konfrans çərçivəsində Türk Akademiyasının prezidenti Şahin Mustafayev layihənin əsas nəticələrini ictimaiyyətlə bölüşüb. Tədbirdə Azərbaycan, Qazaxıstan, Qırğızıstan, Özbəkistan və Türkiyədən olan tədqiqat qrupunun üzvləri də iştirak ediblər.
Türk Akademiyasının “Türk Barometri” adlı analitik layihəsi çərçivəsində hər il həyata keçirilən bu araşdırma Türk Dövlətləri Təşkilatına (TDT) üzv ölkələr arasında müxtəlif sahələrdə əməkdaşlığın səviyyəsini qiymətləndirmək məqsədi daşıyır. Builki araşdırmada əsas diqqət elm və təhsil sahələrində əməkdaşlığa yönəlib. Tədqiqatda orta və ali təhsil müəssisələrində çalışan 4131 professor-müəllim heyəti, 156 aparıcı universitet rektoru, alim və təhsil eksperti iştirak edib.
Tədqiqatın diqqətəlayiq nəticələrindən biri akademik ictimaiyyətin Orxun Akademik Mübadilə Proqramı haqqında məlumatlılığın aşağı səviyyədə olduğunu ortaya çıxıb. Belə ki, bu Proqramın istifadəçilərinin ən yüksək göstəricisinin Azərbaycanda olmasına baxmayaraq (9,49%), respondentlərin əksəriyyəti (44,69%) bu proqramdan ümumiyyətlə məlumatsızdırlar. Türkiyədə də Orxun Proqramından yararlananların nisbəti olduqca aşağıdır (1,87%).
Digər tərəfdən, araşdırmalar göstərdi ki, Türk dünyasında akademik dairələr ortaq elm və təhsil sahəsinin inkişaf etdirilməsi potensialına inanırlar. İştirakçılar birgə təhsil proqramlarının yaradılmasına, professor-müəllim heyəti və tələbə mübadiləsinə, birgə elmi layihələrin həyata keçirilməsinə dəstək olduqlarını bildiriblər. Ölkə üzrə müəyyən edilmiş tematik prioritetlər aşağıdakı kimi sadalanır:
• Azərbaycanda pedaqoji və tibb sahələrində əməkdaşlıq, o cümlədən türk dilləri, ədəbiyyatı, mədəniyyəti və tarixi üzrə birgə tədqiqatlar ön plandadır;
• Qazaxıstanda turizm təhsilinin inkişafı;
• Qırğızıstanda mədəni birliyin möhkəmləndirilməsi vasitəsi kimi birgə tarixi və mədəni tədqiqatların aparılması.
İştirakçılar türk dövlətləri arasında diplomların və elmi adların qarşılıqlı tanınması prosedurlarının asanlaşdırılmasının vacibliyini də qeyd ediblər. Bu addımın elm və təhsil inteqrasiyasının dərinləşməsində mühüm vasitə olacağı vurğulanıb.
Konfransda Türk dünyasının elmi və intellektual dairələrinin geniş iştirakı olub. İştirakçılar arasında deputatlar, professorlar, dosentlər, elmlər doktorları, aparıcı elm və təhsil müəssisələrinin direktorları, türk dövlətlərinin Bakıdakı səfirləri var idi.
“Türk Barometri 2024” sorğusu inteqrasiya proseslərinin mövcud vəziyyətini obyektiv qiymətləndirməyə imkan verən mühüm analitik vasitədir. O, türk dövlətləri arasında elm və təhsil sahəsində harmonik strategiyaların hazırlanması üçün möhkəm zəmin yaradır”, – deyə Türk Akademiyasının prezidenti Şahin Mustafayev bildirib.
