Azərbaycanın Aktau şəhərindəki Baş konsulluğunda Xocalı soyqırımının 33-cü ildönümü ilə bağlı tədbir keçirilib.
Baş konsulluqdan Alp.az-a verilən məlumata görə, tədbirdə Baş konsulluğun əməkdaşları, Türkiyənin, Özbəkistanın, Türkmənistanın, İranın Aktaudakı baş konsulları, Ş. Yessenov adına Xəzər Texnologiya və Mühəndislik Universitetinin rektoru Berik Axmetov, universitetin müəllim və tələbələri, ictimai-siyasi xadimlər, Azərbaycan diasporunun üzvləri iştirak ediblər.
İştirakçılar əvvəlcə Xocalı soyqırımının dəhşətlərini özündə əks etdirən fotosərgi və kitablarla tanış olub, faciə qurbanlarının xatirəsinə düzəldilmiş guşəyə gül dəstələri qoyub və onların ruhuna dualar ediblər.
Mərasimdə çıxış edən baş konsul Ayxan Süleymanlı deyib ki, 1992-ci il fevralın 25-dən 26-na keçən gecə Xankəndi şəhərində yerləşən 366-cı motoatıcı alayının şəxsi heyətinin iştirakı ilə Azərbaycan xalqına – Xocalı sakinlərinə qarşı soyqırım törədilib. Bu hərbi təcavüz zamanı Xocalı ağır hərbi texnikalardan şiddətli atəşə tutularaq darmadağın edilib, dinc sakinlərə amansızcasına divan tutulub. Bir neçə saat ərzində 613 soydaşımız, o cümlədən 106 qadın, 63 uşaq və 70 qoca xüsusi qəddarlıqla qətlə yetirilib, meyitlər üzərində təhqiredici hərəkətlərə yol verilib. Kütləvi qırğın həyata keçirilərkən 8 ailənin həyatına son qoyulub, 25 uşaq hər iki valideynindən, 130 uşaq isə valideynlərinin birindən məhrum edilib, 487 dinc Xocalı sakini ağır yaralanıb və 1275 nəfər girov götürülüb.
O, Xocalı soyqırımından 33 il keçməsinə baxmayaraq, bu yaranın xalqımızın qəlbini indi də sızlatdığını qeyd edərək bildirib ki, Ermənistanın sabiq prezidenti Serj Sarkisyan britaniyalı ekspert Tomas de Vaala verdiyi müsahibədə, o cümlədən “Böyük Ermənistan”ın əsas ideoloqlarından biri Zori Balayanın “Ruhumuzun dirçəlişi” əsərində Xocalı qətliamının məqsədyönlü olduğunu açıq şəkildə etiraf etmişlər.
A. Süleymanlı Xocalı soyqırımının dünyada tanıdılması istiqamətində Heydər Əliyev Fondunun sistemli tədbirlər həyata keçirdiyini, 2008-ci ildə Heydər Əliyev Fondunun vitse-prezidenti Leyla xanım Əliyevanın təşəbbüsü ilə başlanmış “Xocalıya ədalət!” beynəlxalq kampaniyanın hazırda uğurla davam etdiyini diqqətə çatdırıb. O qeyd edib ki, görülən işlərin nəticəsində son bir neçə ildə beynəlxalq ictimaiyyət Xocalı soyqırımının tanınması istiqamətində ciddi addımlar atıb. İslam Əməkdaşlıq Təşkilatı, 17 ölkənin parlamenti, ABŞ-ın 20-dən çox ştatı və bir neçə beynəlxalq təşkilat tərəfindən Xocalı soyqırımı haqqında müvafiq sənədlər qəbul edilib.
Çıxışını davam etdirən baş konsul bildirib ki, 2020-ci ilin sentyabrın 27-də başlayan 44 günlük Vətən Müharibəsi nəticəsində Azərbaycan Prezidenti cənab İlham Əliyevin rəhbərliyi altında müzəffər ordumuz işğal edilmiş torpaqlarımızı azad edib və 2023-cü il sentyabrın 19-20-də Azərbaycan Respublikasının Konstitusiya quruluşunun bərpası məqsədilə Qarabağ bölgəsində lokal antiterror tədbirlərinə başlanılıb, nəticədə Azərbaycanın suverenliyi tamamilə bərpa edilib. \
Diplomat tədbir iştirakçılarının diqqətinə çatdırıb ki, artıq işğaldan azad edilmiş bir çox ərazilərə, o cümlədən Xocalı şəhərinə məcburi köçkünlərin öz doğma yurdlarına köçürülməsi davam etdirilir.
Çıxışının sonunda A.Süleymanlı Xocalı soyqırımının günahkarları – Robert Köçəryan,Serj Sarkisyan, Seyran Ohanyan və digərləri bəşəriyyət qarşısında mütləq cavab verəcəklərini qeyd edib və Azərbaycan xalqının Xocalı soyqırımını heç vaxt unutmayacağını diqqətə çatdırıb.
Tədbirdə diplomatik nümayəndəliklər adından çıxış edən Türkiyənin Aktaudakı baş konsulu Sabri Alptekin Xocalı soyqırımının insanlığa sığmayan vəhşi cinayət olduğunu vurğulayıb. Onun sözlərinə görə, Xocalı sakinləri türk olduqları üçün amansızlıqla qətlə yetirilib.
“Dostluq” Etno-mədəni Birliyinin sədri Şəmsəddin Hüseynov, Azərbaycan diasporunun üzvü Vaqif Əliyev öz çıxışlarında Xocalıda mülkü əhaliyə qarşı törədilmiş amansız qətliamı pisləyərək, gələcəkdə bu tip qanlı hadisələrin təkrarlanmaması üçün cinayətkarların cəzalandırılmasının vacibliyini qeyd ediblər.
Tədbirin sonunda gənc rəssam Lalə Hüseynzadənin Xocalı soyqırımına həsr etdiyi “Qumla rəsm videosu”, ardından isə Vaqif Mustafayevin rejissoru olduğu “Dərdimi çəkirəm” sənədli filmi nümayiş etdirilib və iştirakçılara ehsan verilib.
