Bu gün şəhid Hikmət Abbaslının həm doğum, həm də anım günüdür.
Şəhid Abbaslı Hikmət Zahir oğlu 18 yanvar 1999-cu ildə Beyləqan şəhərində anadan olub. O, 2006-cı ildə Fərman Hacıyev adına Beyləqan şəhər 2 nömrəli tam orta məktəbin 1-ci sinfinə gedib, 2017-ci ildə həmin məktəbin 11-ci sinfini bitirib. 2017-ci ildə Bakı Humanitar Kollecinin muzey işi və abidələrin mühafizəsi ixtisasına daxil olub. Hikmət təhsilini dondurduqdan sonra 2017-ci ilin yanvar ayında Səfərbərlik və Hərbi Xidmətə Çağırış üzrə Dövlət Xidmətinin (SHXÇDX) Beyləqan rayon şöbəsi tərəfindən ordu sıralarına çağırılıb. O, Əlahiddə Ümumqoşun ordusunun Naxçıvan Muxtar Respublikasında yerləşən “N” saylı hərbi hissəsinin kəşfiyyat bölüyündə hərbi xidmətdə olub. Hərbi qulluqda olduğu müddətdə özünü nizam-intizamlı, vəzifə borclarına layiqincə yanaşan, üzərində məsuliyyəti dərindən dərk edən bir əsgər kimi göstərib. Hikmət 2018-ci il iyul ayında hərbi xidmətini uğurla başa vurub. Daha sonra o, Bakı şəhərində siqnalizasiya və təhlükəsizlik işi ilə məşğul olan şirkətlərdən birində işə düzəlib.
2020-ci ilin 12 iyulunda düşmənin təxribatı nəticəsində Azərbaycan-Ermənistan dövlət sərhədinin Tovuz rayonu sahəsində gedən şiddətli döyüşlər bir çoxları kimi Hikmətin də həyatının dönüş nöqtəsi olub. Milli Qəhrəman general-mayor Polad Həşimovun şəhadətindən sonra o, SHXÇDX-nin Beyləqan rayon şöbəsinə könüllü olaraq xidmət etmək üçün müraciət edib.
Lakin 1 aydan çox vaxt keçsə də, hər hansı bir cavabın çıxmamasını görən qəhrəmanımız sənədlərini “Müddətdən artıq həqiqi hərbi xidmət hərbi qulluqçularının hazırlığı” kursuna verib. Kursu uğurla bitirərək Silahlı Qüvvələrin Beyləqan rayonunda yerləşən “N” saylı motoatıcı hərbi hissəsinin kəşfiyyat taborunda kəşfiyyatçı kimi xidmətə başlayıb. Müddətdən artıq hərbi qulluğunun ilk ayı təlimlərdə iştirak edib, orada verilən tapşırıqların öhdəsindən uğurla gəlib.
Təcavüzkar Ermənistanın sentyabrın 27-də əl atdığı növbəti qanlı təxribatına cavab olaraq ordumuzun başladığı əks-hücum əməliyyatında Hikmət xidmət etdiyi hərbi hissənin tərkibində döyüşlərə qatılmışdır. O, Füzuli, Cəbrayıl, Hadrut və Şuşa istiqamətlərində gedən döyüşlərdə igidliklər göstərib, qəhrəmanlıqlığı ilə seçilib. Noyabrın 8-də Hikmətin təmsil olunduğu bölük Şuşaya girib onlara verilən tapşırığı yerinə yetirəndən sonra son döyüşü Şuşa ətrafında Şuşa kəndlə Muxtar kənd arasında olub. Hikmət və bir neçə döyüş yoldaşı dumanlı havada yaralı gizirimizi xilas etmək üçün getdikləri yerdə mühasirəyə düşüb. Onlar rəşadətlə döyüşsə də, çıxmağa müvəffəq olmayıblar. Erməninin yaxınlıqdakı “UAZ” avtomobilinə minib ərazidəki yaralı gizirimizi götürüb çıxmaq istəyərkən düşmən maşını vurub. Hikmət və yoldaşları qəlpə yarası alaraq şəhid olmuşdur. Ancaq yaralı gizirimiz meşədə sağ qalıb. Səhərisi gün noyabrın 10-da döyüş yoldaşları gəlib onları tapıb ərazidən çıxarıblar. Qəhrəmanımız noyabrın 11-də-doğum günündə Beyləqan rayonunun Şəhidlər Xiyabanında dəfn edilib.
Qeyd: Hikmət, əslində, 1998-ci ilin noyabrın 11-də anadan olmuş, ancaq sənədləşmədə yanvarın 18-nə yazılmışdır.
Qəhrəmanımız subay idi. Ailədə bir bacı, iki qardaş idilər.
Cəsurluğu və şücaəti ilə adını tariximizin şanlı səhifəsinə əbədi yazan əsgər Abbaslı Hikmət Zahir oğlu ölümündən sonra iştirak etdiyi döyüş əməliyyatlarında və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə görə Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin sərəncamı ilə “Vətən uğrunda” medalı ilə təltif edilib.
Ruhu şad olsun!
Ramil Hikmət
