Bu gün şəhid Anasından xeyir-dua alaraq şəhidlik zirvəsinə ucaldı: Xüsusi Təyinatlı şəhidimizun doğum günüdür.
Şəhid Vəliyev Elnur Mirsiyab oğlu 1999-cu il 30 avqustda Beyləqan rayonunun Təzəkənd kəndində zəhmətkeş kəndli ailəsində dünyaya gəlib. O, 2005-ci ildə Əliheydər Məmmədov adına Təzəkənd kənd orta məktəbinin 1-ci sinfinə gedib. Körpə yaşlarından atası onları tərk etsə də, anası min bir əzaba qatlaşaraq oğlunun təhsilini başa vurmasına kömək edib. O, 2016-cı ildə orta təhsilini başa vurduqdan sonra ailəsinə kömək məqsədilə müxtəlif işlərdə çalışıb. 2017-ci ildə Səfərbərlik və Hərbi Xidmətə Çağırış üzrə Dövlət Xidmətinin (SHXÇDX) Beyləqan rayon şöbəsi tərəfindən həqiqi hərbi xidmətə çağırılan şəhidimiz Daxili Qoşunların Bakı şəhərində yerləşən “N” saylı hərbi hissəsində xidmətə başlayıb daha sonra isə Qəbələ və Şəki şəhərində yerləşən hərbi hissələrdə hərbi qulluğuna davam edib.
Müddətli hərbi xidmətini başa vurduqdan sonra 2020-ci ildə sənədlərini “Müddətdən artıq həqiqi hərbi xidmət hərbi qulluqçularının hazırlığı” kursuna verib. Kursu uğurla bitirərək Xüsusi Təyinatlı Qüvvələrin “N” saylı hərbi hissəsində fəaliyyətə başlayıb. İşə başladığı ilk günlərdən nizam intizamı, özünə qarşı tələbkar olması ilə seçilən Elnur döyüş və fiziki hazırlıqdan da geri qalmır, daim öz üzərində işləyirdi.
27 sentyabr 2020-ci il Vətən müharibəsi başlayan ilk gündən Elnur Murov dağdan Kəlbəcər istiqamətində hücuma keçən XTQ-nın tərkibində döyüşmüşdür. 28 sentyabrda verilən döyüş tapşırığını yerinə yetirib geri qayıdarkən düşmənin ağır artilleriyasından atılan mərmi Elnurun yanına düşür. O aldığı qəlpə yaralarından şəhidlik zirvəsinə ucalıb. Şəhidimizin nəşi bir neçə gün neytral ərazidə qaldıqdan sonra oktyabrın 2-də ailəsinə təhvil verilib. Şəhidimiz elə həmin gün Təzəkənddə uğrunda canını fəda etdiyi Vətən torpağına tapşırılıb.
Şəhidimizin anası oğlunu son dəfə işə yola salmasından danışır: “Onu həmişə gülə-gülə yola salardım. Amma sonuncu dəfə qeyri-iradi gözümdən yaş axırdı. Elnur niyə ağladığımı soruşdu. Sənə baxanda ürəyim parçalanır…bilmirəm,niyə?”,- dedim. Anası Elnurun da ağladını hiss etsə də, ona baxa bilmir. Sanki o gün hər ikisi olacaqları hiss edibmiş. Oğlunun şəhid olmasından isə yalnız dəfn günü xəbər tutub.
Elnur subay idi, ailədə iki qardaş idilər.
Döyüş əməliyyatları zamanı vəzifə borcunu şərəflə yerinə yetirdiyinə görə Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin sərəncamları ilə əsgər Vəliyev Elnur Mirsiyab oğlu ölümündən sonra “Vətən uğrunda” və “Kəlbəcərin azad olunmasına görə” medalları ilə təltif edilib.
Ramil Hikmət
