Bu gün şəhid Quliyev Muradın doğum günüdür.
Şəhid Quliyev Murad Şahin oğlu 1998-ci il avqustun 11-də Beyləqan rayonunun Birinci Şahsevən kəndində dünyaya gəlib. O, 2004-cü ildə Əli Rüstəmov adına Birinci Şahsevən kənd 2 nömrəli tam orta məktəbin 1-ci sinfinə daxil olub. Məktəbdə fiziki hazırlığı ilə yaşıdlarından fərqlənən Murad hərbi yarışlara marağı və qabiliyyəti ilə də seçilib. Müəllimləri və sinif yoldaşları ilə qarşılıqlı münasibətdə mədəni və nəcib davranışı ilə hər kəsin sevimlisinə çevrilən qəhrəmanımız 2015-ci ildə 2 nömrəli tam orta məktəbin 11-ci sinfini bitirib. 2016-cı ilin oktyabrında Səfərbərlik və Hərbi Xidmətə Çağırış üzrə Dövlət Xidmətinin (SHXÇDX) Beyləqan rayon şöbəsi tərəfindən ordu sıralarına çağırılan Murad Bakı şəhərində yerləşən “N” saylı hərbi hissədə xidmətə başlayıb. O, xidməti ərzində həm mənəvi-psixoloji, həm fiziki, həm də döyüş hazırlığı səviyyəsinin yüksək olması ilə fərqlənib fəxri fərman və təşəkkürnamələrə layiq görülüb. 2018-ci ilin aprelində hərbi xidmətini uğurla başa vuran Murad bir müddət kənd təsərrüfatı ilə məşğul olub. 2020-ci ildə isə sənədlərini Silahlı Qüvvələrin “Müddətdən artıq həqiqi hərbi xidmət hərbi qulluqçularının hazırlığı” kursuna verib. Kursu uğurla bitirərək Silahlı Qüvvələrin Beyləqan rayonunda yerləşən “N” saylı hərbi hissəsində qumbaraatan əsgər kimi xidmətə başlayıb. Daha sonra isə hərbi təlimlərə qatılıb. O, keçirilən təlim məşqlərdə hərbi biliklərini artırıb, döyüş vərdişlərinə yiyələnib. İşinə məsuliyyət ilə yanaşıb ona verilən hədəfləri qumbaraatanla dəqiq vurub hərbi qulluqçularımız arasında fərqlənməyi bacarıb.
Hələ təlimlərdə adından söz etdirən Murad 2020-ci il sentyabrın 27-də başlayan Vətən müharibəsində də qəhrəmanlığı ilə yadda qalan igidilərimizdən biri olub. Muradın döyüş yolu Füzuli rayonunun Alıxanlı kəndindən başlayıb. O, təmsilçisi olduğu hərbi hissənin bölmələri ilə birlikdə qısa müddət ərzində düşmənin uzun illərdir möhkəmləndiyi müdafiə səddininin yarılmasında iştirak edib bir neçə kəndin işğaldan azad edilməsində xüsusi fədakarlıqlar göstərib. Murad hədəfində olan düşmənə sağ qalmaq şansı vermir, döyüş texnikalarını qumbaraatanla vurub sıradan çıxarırdı. Sentyabrın 29-da növbəti döyüşlərin birində ayağından qəlpə yarası alan qəhrəmanımız hospitala gəlib tibbi yardım aldıqdan sonra yarası sağalmasa da, yenidən döyüş yoldaşlarının yanına qayıdıb. Oktyabrın 3-də Füzuli rayonunun Aşağı Seyidəhmədli kəndində düşmənin şəxsi heyətini vurduqdan sonra Muradın yerini müəyyən edən mənfur düşmən onu baş nahiyyəsindən snayperlə vurub. Qəhrəmancasına şəhidlik zirvəsinə ucalan Murad oktyabrın 4-də Birinci Şahsevən kəndində uğrunda canını fəda etdiyi vətən torpağına tapşırılıb.
Subaydır.Ailədə bir qardaş,bir bacı idilər.
Qəhrəmanlığı və cəsarəti ilə adını tariximizin şanslı səhifəsinə yazdıran əsgər Quliyev Murad Şahin oğlu ölümündən sonra iştirak etdiyi döyüş əməliyyatlarında və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə görə Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin sərəncamları ilə “Vətən uğrunda” ,“Cəsur döyüşçü” və “Füzulinin azad olunmasına görə” medalları ilə təltif edilib.
Ramil Hikmət
