Qazaxıstan Azərbaycanlıları Assosiasiyasının Astana şəhərində toplantısı keçirilib.
Alp.az-a Assosiasiyadan verilən məlumata görə, toplantıda təşkilatın fəaliyyəti və qarşıda duran perspektivlər mövzusunda çıxışlar olub.
İclasda Assosiasiyanın gələcək fəaliyyətinin stimullaşdırılması və xüsusən də ölkənin paytaxtı Astanada bu istiqamətdə işlərin aparılması üçün təkliflər irəli sürülüb. Toplantıda əvvəlcədən müəyyən olduğu kimi Assosiasiyanın Astana nümayəndəliyinin rəhbərliyinə seçkilər keçirilib. Səsvermə nəticəsində Baxış Quliyev bu vəzifəyə seçilib.
Tədbirdə tanınmış diaspora fəalı və yeni sədr Baxış Quliyev Azərbaycan icması ilə Qazaxıstan cəmiyyəti arasında əlaqələrin daha da möhkəmləndirilməsi məqsədilə mədəni və humanitar təşəbbüslərin inkişafı istiqamətində fəaliyyətini davam etdirəcəyini deyib.
Qeyd edək ki, Qazaxıstan Azərbaycanlıları Assosiasiyası (QAA) bu ölkədə yaşayan soydaşlarımızın mədəni təşkilatıdır. Bu təşkilat, Qazaxıstanda yaşayan azərbaycanlıların hüquqlarını qorumaq, mədəniyyətlərini yaşatmaq və azərbaycanlılar arasında əlaqələri gücləndirmək məqsədi ilə yaradılıb.
