image-ads_2000x150
image-246155023_2660853450726529_7640086402478201870_nbackend

İki döyüşün qəhrəmanı: Mansur Teymurovun şəhadətə qovuşduğu gündür

image-ads_728x90

44 günlük Vətən Müharibəsində qəhrəmanlığı ilə dastan yazan oğullarımızdan biri də şəhid Mansur Teymurovdur.

Şəhid Teymurov Mansur Elnur oğlu 1999-cu il iyunun 5-də Beyləqan rayonunun İkinci Şahsevən kəndində dünyaya gəlib. O, 2005-ci ildə Dayandur Əliyev adına İkinci Şahsevən kənd tam orta məktəbin 1-ci sinfinə daxil olub. 5-ci sinfi bitirdikdən sonra isə Dövlət Sərhəd Xidmətinin Mərdəkanda yerləşən xüsusi məktəbinə imtahan verib və yüksək nəticə göstərərək təhsilinə orada davam edib. 10-cu sinifdə yenidən kəndlərinə qayıdan Mansur İkinci Şahsevən kənd tam orta məktəbin 11-ci sinfini bitirib. O, 2017-ci ilin iyul ayında Səfərbərlik və Hərbi Xidmətə Çağırış üzrə Dövlət Xidmətinin (SHXÇDX) Beyləqan rayon şöbəsi tərəfindən ordu sıralarına çağırılıb. Mansur Əlahiddə Ümumqoşun ordusunun Naxçıvan Muxtar Respublikasının Kəngərli rayonunda yerləşən “N” saylı hərbi hissəsində hərbi xidmətdə olub. Hərbi xidmətini hünərlə yerinə yetirən qəhrəmanımız 2018-ci ilin may ayında “Günnüt” əməliyyatında iştirak edib və Müdafiə Naziri tərəfindən şəxsən mükafatlandırılıb. Hərbi xidmətini uğurla başa vuran Mansurun vətənə olan sevgisi onu müddətdən artıq hərbi xidmətə başlamağa sövq edib. O, 2019-cu ildə sənədlərini “Müddətdən artıq həqiqi hərbi xidmət hərbi qulluqçularının hazırlığı” kursuna verib. Kursu uğurla bitirərək Beyləqan rayonunda yerləşən “N” saylı hərbi hissədə sanitar sürücü vəzifəsində xidmətə davam edib. Mansur qısa müddətdə peşəkar sürücü kimi özünü təsdiq edib kollektivdə sayılıb-seçilən insanlardan olub.

O həm də vətənpərvərliyi seçilirdi. Qəhrəmanımızın vətənpərvərlik dəyərlərini mənimsəməsində göz açdığı mühitin və yaşadığı zamanın təsiri olsa da, o, daha çox əslən Füzuli rayonunun Üçbulaq kəndindən olan nənəsi Solmaz xanımın vətən sevgisi və tarixi reallıqlarla bağlı söhbətləri vasitəsi ilə vətəninə bağlanıb. 2020-ci ilin sentyabrın 27-də Vətən müharibəsi başlayanda hər bir azərbaycanlı kimi Mansurun da arzusu düşmən tapdağında olan torpaqları azad etmək, nənəsini öz doğma kəndlərinə aparmaq idi. Mansur döyüşlər başlayan ilk gündən etibarən ən çətin və keçilməz ərazilərdə, düşmənin atəşi altında, çoxlarının cəsarəti çatıb girə bilmədiyi mövqelərdən yaralılarımızı çıxarıb, xəstəxanalara çatdırır, onların həyatda qalmasına yardımçı olurdu. O, təkcə sanitar sürücü xidməti göstərmirdi, həm də peşəkar hərbçi kimi digər əməliyyatlarda da yaxından iştirak edirdi. Arada vaxt tapıb ailəsi ilə danışmağı da unutmur, onlarla fəxrlə danışıb hər şeyin yaxşı olacağını deyirdi. Mansur sanki şəhid olacağını hiss edirmiş. Oktyabrın 17-də evlərinə gəlib ailə üzvləri ilə görüşüb gedəndə isə deyib:”Sabah qələbə xəbərimizi eşidəcəksiniz”. O, oktyabrın 18-i öz məsuliyyətli və şərəfli işini icra edərkən ermənilərin pusqusuna düşüb. Belə ki, o, tibb xidməti baş giziri Eldar Abdullayev ilə birlikdə döyüşdə yaralanan hərbçiləri təcili tibb maşınına mindiriblər. Sonra məlum olub ki, döyüş gedən ərazidə yaralılardan biri qalıb və dərhal həmin yaralını götürməyə gediblər. Və bu zaman pusquya düşərək şəhid olublar. Mansur oktyabrın 19-da doğulduğu kənddə uğrunda canını fəda etdiyi vətən torpağına tapşırılıb.
Subay idi. Ailədə bir bacı, iki qardaş idilər.

Cəsurluğu ilə adını tariximizin şanlı səhifəsinə yazan əsgər Teymurov Mansur Elnur oğlu ölümündən sonra iştirak etdiyi döyüş əməliyyatlarında və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə görə Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin sərəncamları ilə “Vətən uğrunda” və “Qubadlının azad olunmasına görə” medalları ilə təltif edilib.

Loading...
image-ads_728x90

  • whatsapp
  • messenger
  • telegram
  • vkontakte
  • odnoklassniki