Muxtar Auezovun Azərbaycan dilinə tərcümə edilmiş və latın əlifbası ilə yenidən çap olunmuş romanı Bakıda işıq üzü görüb.
Alp.az-ın məlumatına görə, bu gün Bakıda, Atatürk Mərkəzində Beynəlxalq Türk Akademiyasının təşəbbüsü və nəşri ilə latın əlifbası ilə Azərbaycan dilində hazırlanan, Muxtar Auezovun “Abay” romanının yeni nəşrinin təqdimat mərasimi keçirilib. Bu xüsusi buraxılış dahi qazax mütəfəkkiri və ziyalısı Abay Kunanbayulinin anadan olmasının 180 illiyi münasibətilə hazırlanıb.
Mərasimin açılışında çıxış edən Türk Akademiyasının prezidenti, akademik Şahin Mustafayev bildirib ki, bu nəşr əsərin bədii gücünü yenidən üzə çıxarmaqla yanaşı, Qazaxıstan və Azərbaycan arasında mədəni əlaqələrin möhkəmlənməsinə də töhfə verir.
Roman ilk dəfə 1954-cü ildə Eyyub Abbasov tərəfindən rus dilinə tərcüməsindən Azərbaycan türkcəsinə tərcümə edilib.Lakin o vaxtdan, üstündən 70 il keçməsinə baxmayaraq, əsər yenidən nəşr olunmayıb və Azərbaycan oxucusunun geniş auditoriyası üçün əlçatan olmayıb.
Yeni nəşrdə əsər kiril əlifbasından latın qrafikalı əlifbaya keçirilib. Müasir ədəbi dil normalarına uyğunlaşdırılmaqla, xüsusən də gənc oxucu nəsli üçün daha anlaşıqlı və əlçatan format təqdim edilib.
Akademik Şahin Mustafayev başda layihənin redaktoru Fərid Hüseyn olmaqla əməyi keçən hər kəsə təşəkkür edib. “Abay” romanının bu formatda nəşrinin təkcə ədəbi hadisə deyil, həm də mədəni yaddaşa hörmət və ortaq mənəvi irsin qorunmasının əlaməti olduğunu vurğulayan Ş.Mustafayev Akademiyanın türk xalqlarının mədəni-mənəvi irsinin tədqiqi və təbliği istiqamətində hərtərəfli fəaliyyətini bundan sonra da davam etdirəcəyini bildirib.
Təqdimat proqramı Azərbaycan Atatürk Mərkəzinin prezidenti Nizami Cəfərov, Azərbaycan Milli Məclisinin deputatları, Qazaxıstanın Azərbaycandakı səfiri Alim Bayel, TÜRKPA-nın baş katibi Mehmet Süreyya Er, Türk Mədəniyyəti və İrsi Fondu Aparatının rəhbəri Fəxri Hacıyev, o cümlədən akademik dairələrin və dünya ədəbi ictimaiyyətinin geniş nümayəndələrinin iştirakı ilə keçirilib.
