25 dekabr 2024-cü il tarixində “Azərbaycan Hava Yolları” aviaşirkətinə məxsus “Embraer 190” tipli təyyarənin Aktau şəhəri yaxınlığında qəzaya düşməsi ilə bağlı aparılan qəza-xilasetmə əməliyyatında iştirakına görə Qazaxıstanın Fövqəladə Hallar Nazirliyinin (FHN) 10 əməkdaşı Azərbaycanın fövqəladə hallar naziri Kəmaləddin Heydərov tərəfindən “Əməkdaşlığa görə” döş nişanları ilə təltif edilib.
Azərbaycanın Qazaxıstanın Aktau şəhərindəki Baş Konsulluğundan Alp.az-a verilən məlumata görə, döş nişanlarının təqdim edilməsi üçün fevral 18-də Manqistau Vilayət Administrasiyasının binasında vilayət başçısının, Qazaxıstan FHN-nin vilayət departamentinin rəisinin, Aktau şəhər merinin, bu ölkənin Daxili İşlər Nazirliyinin vilayət departamentinin rəisinin və digər rəsmi şəxslərin iştirakı ilə tədbir keçirilib.
Tədbirdə çıxış edən Baş konsul Ayxan Süleymanlı Qazaxıstanın baş vermiş faciəyə həssaslıq nümayiş etdirdiyini, qəza baş verdikdən sonra dərhal axtarış-xilasetmə əməliyyatının həyata keçirilməsində yüksək operativlik nümayiş olunduğunu, xəsarət alanlara və yaralananlara təxirəsalınmaz tibbi yardım göstərildiyini, sağ qalan Azərbaycan vətəndaşlarının, habelə həlak olan şəxslərin nəşlərinin ölkəmizə gətirilməsində, o cümlədən hadisə ilə bağlı bütün məsələlərdə yaxından dəstək verdiyini qeyd edib.
Baş konsul tədbir iştirakçılarının diqqətinə çatdırıb ki, hadisə baş verən gün vilayət rəhbərliyi tərəfindən baş konsulluğun divarı önünə bir neçə masa qoyulmuş, üzərinə gül çələngləri düzülmüş, konsulluğun divarına qazax dilində şüarlar yazılmış, ətrafda yaşayan qonşular təmənnasız ehsan məqsədi ilə müəyyən təamlar bişirib baş konsulluğa göndərmişdir.
A. Süleymanlı qeyd edib ki, yaralılara kömək məqsədilə yerli sakinlər xəstəxanaya axın edərək könüllü qan vermiş, canıyananlıq nümayiş etdirmişlər. O, bu münasibəti çətin gündə qardaş dəstəyi adlandırmışdır: “Bunu ancaq qardaş xalq çətin gündə edə bilərdi”.
A.Süleymanlı çıxışının sonunda faciə zamanı göstərilmiş köməyə görə dövlətimiz və xalqımız adından, şəxsən öz adından Manqistau vilayətinin başçısı Nurdaulet Kilıbaya, vilayətin güc strukturlarının rəhbərlərinə, əməkdaşlarına, tibb işçilərinə, hadisə zamanı ürəkdən yardım edən qardaş qazax xalqının nümayəndələrinə dərin təşəkkürünü bildirmiş və Azərbaycanın qardaş qazax xalqının bu canıyananlığını heç vaxt unutmayacağını diqqətə çatdırmışdır.
Sonra baş konsul qəzaya uğramış təyyarəmizin sərnişinlərinin xilas edilməsi zamanı cəsarət, peşəkarlıq, canıyananlıq nümayiş etdirmiş Qazaxıstanın FHN-nin əməkdaşlarına döş nişanlarını təqdim etmiş, onları təbrik etmiş və xatirə şəkili çəkdirmişdir.
