Azərbaycan Respublikasının Aktau şəhərindəki Baş Konsulluğunda da “Qara Yanvar” faciəsi qurbanlarının xatirəsinə həsr olunmuş tədbir keçirilib.
Alp.az-ın məlumatına görə, tədbir çərçivəsində iştirakçılar 1990-cı il yanvarın 20-də baş vermiş faciəli hadisələr zamanı həlak olanların xatirəsini bir dəqiqəlik sükutla yad ediblər.
Baş konsul Ayxan Süleymanlı bildirib ki, bu hadisə Azərbaycanın müstəqillik yolunda ən mühüm mərhələlərdən biri hesab olunur.
Tədbirdə çıxış edən Türkiyənin Baş konsulu Sabri Alptekin, professor Yusif Quliyev, “Dostluq” Etno-Mədəni Birliyinin sədri Şəmsəddin Hüseynov, o cümlədən Azərbaycan diasporunun nümayəndələri, ictimai xadimlər və diplomatlar çıxış edərək, həmin dövrün hadisələrinin milli birliyin və ölkənin müstəqilliyinin güclənməsi baxımından tarixi əhəmiyyətini vurğulayıblar.
İştirakçılar bu faciəli tarixdən çıxarılan dərsləri, habelə “Qara Yanvar”ın gələcək nəsillər üçün xatirə olaraq saxlanılmasının vacibliyini müzakirə ediblər.
Tədbir Azərbaycan və Qazaxıstan arasında möhkəm mədəni və tarixi əlaqələrin, iki qardaş xalq arasında dostluq və əməkdaşlığın daha da möhkəmləndirilməsi üçün əsas olduğunu bir daha vurğuladı.
