Türkiyənin “Roketsan” şirkəti tərəfindən inkişaf etdirilən “Tayfun” ballistik raketinin növbəti atış sınağı keçirilib.
Alp.az “Roketsan”a istinadən xəbər veri ki, Türkiyənin Rizə-Artvin hava limanında baş tutan uzun mənzilli atış sınağında “Tayfun” raketi dənizdə suüstündəki hədəfi dəqiqliklə vurub.
Beləliklə, “Tayfun” ballistik raketi keçirilən üçüncü atış sınağını da uğurla tamamlayıb.
Xatırladaq ki, 500 kilometrdən çox mənzilə sahib olan “Tayfun” raketinin ilk atış sınağı 2022-ci ilin oktyabr ayında baş tutub.
Qeyd edək ki, “Roketsan” şirkətinin baş direktoru Murat İkinci əvvəlki müsahibələrinin birində “Tayfun” raketinin bir məhsuldan ibarət olmayacağını, onun müxtəlif variantlarının olacağını açıqlamışdı.
“Döyüş başlıqlarındakı qabiliyyət müxtəlifliyi ilə bir məhsul ailəsi kimi Silahlı Qüvvələrimizə xidmət göstərəcək strateji silah sistemi olacaq. Hazırda “Tayfun”un seriyalı istehsalı davam edir. Silahlı Qüvvələrimiz bununla bağlı ehtiyaclarını bizimlə bölüşür. Sonrakı mərhələlərdə “Tayfun” layihəsi hazır məhsul kimi deyil, öz variantları və yeni imkanları ilə Silahlı Qüvvələrimizin tələbatını ən yüksək səviyyədə ödəyəcək bir sistem kimi həyatını davam etdirəcək”, – deyə M.İkinci bildirmişdi.
