44 günlük Vətən savaşı hər kəsi birləşdirdi. Hər kəs canı qədər sevdiyi vətən üçün çalışmağa başladı. Milliyyətindən, dinindən asılı olmayaraq Azərbaycan vətəndaşları silaha sarıldı. Alp.az xəbər verir ki, vətənin dar günündə silaha sarılan oğullardan biri də, Azərbaycanda doğulan ərəbəsilli 18 yaşlı Muhamməd Eissavi olub. Muhamməd cəmi 18 yaşında canını vətən uğrunda qurban verdi. Şəhidimiz əslən fələstin ərəbi olsa da doğulduğu Azərbaycan üçün son damla qanına qədər vuruşdu. Muhammədin atası Mazen Eissavi fələstinli ərəbdir.
Atası 1998-ci ildən Bakıda yaşayır. Bakda dərman firmasında işləyib, elə məhz iş yerində birgə işlədiyi azərbaycanlı xanımla ailə qurub. Bu xöşbəxt ailənin övladı olub Muhamməd… Ailənin ilk muradı olub qəhrəmanımız.
Muhamməd 2002- ci ildə Bakıda dünyaya gəlib. Azərbaycan vətəndaşı olub.
Bakı şəhəri 76 nömrəli məktəbin məzunu olub. Kiçik yaşlarından Cüdo idman növü ilə məşğul olan Muhamməd bir çox turnirlərin qalibi olub . Vətən müharibəsində xidmətdə olan Muhamməd elə döyüşlərin ilk günündən ən çətin nöqtələrdə olub. Xocavənd, Ağdam istiqamətində döyüşlərin iştirakçısı olub. Qələbəyə 1 gün qalmış şəhadətə yüksəlib Muhamməd. Noyabrın 9-da qanlı döyüşlərin birində qəhrəmanlıqla şəhid olub. Azərbaycanın ərazi bütövlüyünün təmin edilməsi uğrunda döyüş əməliyyatlarında qarşısına qoyulmuş hərbi tapşırıqların icrası zamanı vəzifə borcunu şərəflə yerinə yetirdiyi üçün Muhamməd Eissavi Ali Baş Komandan İlham Əliyev tərəfindən ölümündən sonra “Vətən uğrunda” və “Xocavəndin azad olunmasına görə ”medalları ilə təltif edilib. Ruhu şaddır!
