İyunun 20-də Vətən müharibəsi şəhidi, gizir Yaqublu Fərman Telman oğlunun doğum günü qeyd edilib. Şəhidin doğum günündə yaxınları, dostları onun Beyləqan rayonu Qəhrəmanlı qəsəbəsindəki məzarını ziyarət ediblər. Qeyd edək ki, Fərman Yaqublu 2021-ci ilin iyulun 23-də Ermənistan Silahlı Qüvvələri Basarkeçər rayonu ərazisindəki mövqelərindən Azərbaycan Ordusunun Kəlbəcər rayonu sahəsindəki mövqelərini atəşə tutması nəticəsində şəhid olmuşdu.
1993-cü il təvəllüdlü gizir Yaqublu Fərman Telman oğlu Beyləqan rayonunun Qəhrəmanlı qəsəbə doğulmuşdu və bu qəsəbədə də dəfn edilib.
Şəhid Fərman Yaqublu 44 günlük Vətən Müharibəsində iştirak edib.
Azərbaycan torpaqlarının azadlığı uğrunda döyüşlərdə aktiv iştirak edən qəhrəman gizir Prezident İlham Əliyevin 29 dekabr 2020-ci il tarixli sərəncamı ilə “Kəlbəcərin azad olunmasına görə” medalı ilə təltif edilib.
F.Yaqublunun atası, Yaqubov Telman Fərman oğlu da Qarabağda şəhid olub.
