Onun haqqında çox söhbətlərin şahidi olmuşam. Həmişə Tofiqlə görüşmək istəyim alınmayıb. Günlərin birində dostların köməkliyi ilə görüşdük. İlk anda mədəniyyətinə, danışıq qabiliyyətinə heyran qaldım. Harada təhsil aldığını soruşanda, gülərək:” O, qədər hərbi məktəbdə təhsil almışam ki, hansını deyim”.- deyərək zarafata saldı. Onun şəhid olduğunu eşidəndə doğrusu mənə qəribə gəldi. Yaxın dostumuz Malik Quliyevdən dəqiqləşdirdim. Axı Tofiq ordudan tərxis olunmuşdu. Yox mənim tanıdığım Tofiq əsgərlərini, döyüşü eşidib evdə otura bilməzdi. Elə Tofiq də bizim düşündüyümüzü etmişdi. Müharibə xəbərini alınca silaha sarılmışdı. O, bir qəhrəman idi. Elə qəhrəman kimi də şəhid oldu. Haqqında söhbət acacağım şəhidimiz, Xüsusi Təyinatlı Qüvvələrin mayoru Tofiq Kərimov 7 iyul 1973-cü ildə Qaradağ rayonu Sahil qəsəbəsində anadan olub. Kiçik yaşlarından hərb sənətinə istəyi onu seçilmişlərdən birinə çevirmişdi.
253 nömrəli məktəbin birinci sinifinə daxil olub , amma hərb sənətinə sonsuz sevgisi Tofiqi Cəmşid Naxçıvanski adına hərbi liseyə apardı. Ordu rəhbərliyi bu gənc oğlanın yüksək biliyinə həssaslıqla yanaşaraq onu təhsilini davam etdirmək üçün Sovet İttifaqı Marşalı S.S.Biryuzov adına Riqa Ali Hərbi-Siyasi Məktəbinə göndərdi. Tofiq seçilmiş bir zabit olduğunu burada da göstərdi. Daha sonra Tofiq Bakı Ali Ümumqoşun Komandirlər Məktəbinin də müdavimi oldu.
O, bir cəngavər idi. Elə birinci Qarabağ müharibəsi zamanı cəbhənin Füzuli istiqamətində gedən döyüşlərdə onun qəhrəmanlığı dillərdə dastana çevrilmişdi. Tofiq Kərimov 1998-2004- cü illərdə Xüsusi Təyinatlı Qüvvələrdə, 2004-2010-cu illərdə isə kəşfiyyat bölüyündə xidmət edir. 2010-cu ildə öz istəyi ilə silahlı qüvvələrdən ehtiyyata buraxılır.
Tofiq mütamadi olaraq hərbi hissələrə gedir, görüşlərdə iştirak edirdi. O, Qarabağın azad edilməsi üçün başlanacaq haqq savaşını səbirsizliklə gözləyirdi. O, günün uzaqda olmayacağına da əmin idi.
O, gün gəlib çatmışdı. Tofiq Kərimov da dostları ilə birlikdə düşmənlə savaşa atıldı. Füzuli, Xocavənd, Cəbrayıl döyüşlərində iştirak etdi. “Şuşa üçün sonuna qədər döyüşəcəyik”- deyirdi Tofiq Kərimov. Döyüşdü də son damla qanına qədər Şuşanın azad olunması üçün çalışdı. Və Şuşanı azad edən ilk qrupun üzvlərindən biri oldu. Amma noyabrın 8-i mayor Tofiq Kərimov üçün son döyüş oldu.
3 övladı yadigar qalıb.
Ruhu şad olsun!
