44 günlük Vətən müharibəsində qələbə qazanan Azərbaycan Ordusu 30 ilə yaxındır işğal altında olan torpaqlarını azad edib.
Bu qələbədə bir çox bölgələrimizdən olan könüllü əsgərlərimizin, yüksək rütbəli zabitlərimizin əməyi danılmazdır. Necə deyərlər, torpaq su ilə qarışanda palçıq, qan ilə qarışanda Vətən olur.
Belə ki, Vətən müharibəsində canından keçən, qanı bahasına döyüşərək şəhid olan, torpaqlarımızın azadlığa qovuşmasında iştirak edən şəhid və qazilərimiz də var.
Belə şəhidlərimizdən biri də bu gün doğum günü olan Azərbaycan Xüsusi Təyinatlı Qüvvələrinin baş çavuşu, müddətdən artıq xidmət edən hərbi qulluqçusu, Qurban İbrahimovdur.
Qurban İbrahimov 1998-ci il iyunun 4-də Naxçıvan Muxtar Respublikasının Kəngərli rayonu Qabıllı kəndində anadan olmuşdur.
Azərbaycan Silahlı Qüvvələrinin müddətli həqiqi hərbi xidmət hərbi qulluqçusu olan Qurban İbrahimov 2020-ci il sentyabrın 27-də Azərbaycan və Ermənistan arasında başlanan 2-ci Qarabağ müharibəsi zamanı Hadrutun, Cəbrayılın, Xocavəndin və Laçının azadlığı uğrunda gedən döyüşlərdə savaşıb. Gedən döyüşlərin birində şəhid olmuşdur.
Azərbaycanın ərazi bütövlüyünün bərpa edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Qurban İbrahimov ölümündən sonra “Vətən uğrunda” medalı ilə təltif edildi.
Azərbaycanın Şuşa rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 29.12.2020-ci il tarixli Sərəncamına əsasən Qurban İbrahimov ölümündən sonra “Şuşanın azad olunmasına görə” medalı ilə təltif edildi.
Oğlunun şəhid xəbəri gələn günü ata bu dərdə dözmür. Şəhid atası Namiq İbrahimovun ürəyi dayanır.
Ruhları şad olsun!
