O, bizim gizli qəhrəmanlarımızdan biri idi. Özünü vətənə fəda edən, “Vətən Müharibəsi Qəhrəmanı” Dövlət Sərhəd Xidmətinin Sərhəd Qoşunlarının baş giziri, Şahin Allayarov məhz paylaşdığı bir video ilə məşhurlaşmışdı. Əslində Şahin son videoda həyat yoldaşına bir vəsiyyət edirdi.”Mən ölsəm, məni bağışla… Oğluma mənim adımı verərsən.”-deyirdi Şahin…
“Vətən Müharibəsi Qəhrəmanı”, şəhid Şahin Allahyarov 1993-cü il yanvarın 29-da Şamaxı rayonunun Paşalı kəndində anadan olub. 1995-ci ildən Quba rayonunda yaşayırdı. 1999-2010-cu illərdə Ə. Rüstəmov adına Zizi kənd tam orta məktəbində təhsil alıb. Ailəli idi. Oxsana adında bir qızı və 28.12.2020-ci il tarixində dünyaya gələn Şahin adından oğlu yadigar qaldı.
Dövlət Sərhəd Xidmətinin Sərhəd Qoşunlarının baş giziri olan Şahin Allahyarov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Füzulinin, Cəbrayılın və Şuşanın azadlığı uğrunda gedən döyüşlərdə savaşıb. Şahin Allahyarov noyabrın 1-də Şuşa döyüşləri zamanı şəhid olub. Quba rayonunda dəfn olunub.
Azərbaycanın ərazi bütövlüyünün bərpa edilməsində xüsusi xidmətlərinə və işğal olunmuş ərazilərin azad olunması zamanı düşmənin məhv edilməsi üzrə qarşıya qoyulmuş döyüş tapşırığını yerinə yetirən zaman göstərdiyi qəhrəmanlıq nümunəsinə görə, həmçinin hərbi qulluq vəzifəsini yerinə yetirən zamanı igidliyin və mərdliyin nümayiş etdirilməsinə görə Azərbaycan Prezidenti İlham Əliyevin 09.12.2020-ci il tarixli Sərəncamına əsasən Şahin Allahyarov ölümündən sonra “Vətən Müharibəsi Qəhrəmanı” adı verildi.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Şahin Allahyarov ölümündən sonra “Vətən uğrunda” medalı ilə təltif edildi.
Azərbaycanın Şuşa rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 29.12.2020-ci il tarixli Sərəncamına əsasən Şahin Allahyarov ölümündən sonra “Şuşanın azad olunmasına görə” medalı ilə təltif edildi.
Ruhu şaddır!
