44 günlük Vətən Müharibəsində öz qəhrəmanlığı ilə dastan yazan oğullarımızdan biri də Azər Şükürovdur.
Bu gün şəhid Şükürov Azər Cahid oğlunun doğum günüdür.
Azər 1994-cü il fevral ayının 11-də Beyləqan rayonunun Birinci Şahsevən kəndində dünyaya gəlmişdir. O, 2002-ci ildə Əli Rüstəmov adına Birinci Şahsevən kənd 1 nömrəli tam orta məktəbin 1-ci sinfinə daxil olmuş, 2013-cü ildə həmin məktəbin 11-ci sinfini bitirmişdir. Azər 2014-cü ilin aprelində Səfərbərlik və Hərbi Xidmətə Çağırış üzrə Dövlət Xidmətinin (SHXÇDX) Beyləqan rayon şöbəsi tərəfindən həqiqi hərbi xidmətə çağrılmışdır. Silahlı Qüvvələrin Qazax rayonunda yerləşə “N” saylı hərbi hissəsində xidmət edən Azər komandirləri tərəfindən tədris edilən taktiki hazırlıq dərslərinə diqqətlə yanaşmış, ona verilən tapşırıqları dəqiq və vaxtında yerinə yetirmişdir. Elə buna görə də hərbi qulluğunu başa vurduqda ona həmin hərbi hissədə qalıb xidmətini davam etdirmək təklif olunur. Ancaq valideynləri buna razı olmadığına görə tərxis olub doğma kəndinə qayıdır. Bir müddət sonra isə Beyləqanda yerləşən “CTS AQRO” MMC pambıq istehsalı və emalı zavodunda traktorçu kimi işə başlayır.
Qısa müddət ərzində peşəkar traktorçu kimi formalaşan Azər tək işlədiyi zavodda yox, həm də kənddə adından söz etdirməyi bacarmışdır. El-obada xüsusi hörmətə malik olan Azər həm də vətənpərvərliyi ilə seçilirdi. Elə buna görə də o, Tovuz döyüşlərindən sonra SHXÇDX-ya ərazi bütövlüyü uğrunda başlayacaq mümkün müharibədə iştirak etmək üçün müraciət etmiş və müvafiq formada qeydiyyata alınmışdır. 2020-ci il sentyabrın 21-də ordu sıralarına çağrılan Azərin ailə vəziyyəti nəzərə alınaraq, təlimlərə cəlb olunmamışdır. Ancaq Vətən müharibəsi başlayan gün Azər yenidən SHXÇDX-ın Beyləqan rayon şöbəsinə gedib onu müharibəyə aparmalarını təkid edir.
Nəhayət sentyabrın 29-da könüllü olaraq Ağcabədi rayonunda yerləşən “N” saylı hərbi hissəyə göndərilən Azər növbəti gün oktyabrın 1-də cəbhəyə aparılmışdır. Onun döyüş yolu Cəbrayıldan başlamışdır. Döyüşlərə qatıldığı ilk gündən özünü əsl hərbçi kimi aparan Azər qorxmazlığı və cəsurluğu ilə fərqlənməyi bacarmışdır. O, hər zaman irəli atılır, öz mövqeyində düşmənə göz açmağa aman vermirdi. Cəbrayıl və Qubadlı rayonu ərazisində gedən döyüşlərdə xüsusi fədakarlıqlar göstərən Azər oktyabrın 22-də Qubadlı rayonunda yaxınlığına düşən minomyot mərmisindən aldığı qəlpə yarasından şəhid olmuşdur. Ancaq ailəsi onun şəhid olmasından xəbərsiz olub. Övladını axtaran ailəyə noyabrın 3-də Azərin şəhid olma xəbəri verilmişdir. Qəhrəmanımız noyabrın 4-də Birinci Şahsevən kəndində uğrunda canını fəda etdiyi Vətən torpağına tapşırılmışdır.
Azər ailəli idi. Nurlan və Cahid adlı iki oğlu var.
Şücaəti və qəhrəmanlığı ilə adını Vətən tariximizin şanlı səhifəsinə yazdıran əsgər Şükürov Azər Cahid oğlu ölümündən sonra iştirak etdiyi döyüş əməliyyatlarında və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə görə, Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin sərəncamları ilə “Vətən uğrunda”, “Cəbrayılın azad olunmasına görə” və “Qubadlının azad olunmasına görə” medalları ilə təltif edilmişdir.
Ramil Hikmət
