Bu gün Qubadlı şəhərinin işğaldan azad edilməsindən 2 il ötür. Azərbaycan Ordusunun 2020-ci il sentyabrın 27-də başladığı əks-hücum nəticəsində aparılan döyüş əməliyyatları ilə oktyabrın 25-də Qubadlı şəhəri erməni işğalından azad edilib.
Müharibədən sonra Azərbaycan Respublikasının Prezidenti, Ali Baş Komandan İlham Əliyev tərəfindən “Qubadlının azad olunmasına görə” medalı təsis olunub.
Xatırladaq ki, Qubadlı 1993-cü ilin 31 avqust tarixində Ermənistan Silahlı Qüvvələri tərəfindən işğal edilmişdi.
Alp.az-ın məlumatına görə, Xəzər Müdafiə Tədqiqatları Mərkəzinin rəhbəri, hərbi-siyasi şərhçi Ramil Məmmədli Herbiand.az-a bildirib ki, Qubadlı şəhərinin işğaldan azad edilməsi Azərbaycan ordusu üçün 3 mühüm istiqamətdə üstünlük əldə etmək imkanı yaratdı:
“Birincisi, bu, qismən mühasirədə olan Zəngilanın mühasirə halqasının dağıdılmasıdır. Şimaldan Qubadlı şəhəri ilə qonşu olan Zəngilan üçün bu, çox vacib idi. İkincisi, Azərbaycan ordusu Zəngilandan sonra Ermənistanla ikinci dövlət sərhədinə çıxış imkanı əldə etdi. Üçüncüsü isə, Laçın rayonu, Laçın dəhlizi istiqamətində hərbi əməliyyatlara başlanmasına, Səfiyan və Güləbird kəndləri istiqamətinə çıxış imkanı əldə edildi. Bu üç istiqamət Azərbaycan ordusunun Qubadlını almaqla əldə etdiyi imkanlar və üstünlük idi. Bundan başqa, Qubadlını işğaldan azad etməklə Azərbaycan Silahlı Qüvvələri cənub-qərb istiqamətində Ermənistanla dövlət sərhədini bərpa etdi. Qubadlının azad olunması 44 günlük Vətən müharibəsində Azərbaycan Silahlı Qüvvələrinin keçirdiyi uğurlu əməliyyatlardandır”.
