Ermənilərin qənimi, qorxulu röyası olan əsgərlərimizdən biri də “Qəssab” ləqəbli Xüsusi Təyinatlı şəhid gizirimiz Babək Mahmudlu olub.
Alp.az yaxınlarını dili ilə Babəkin hərb həyatında olan xatirələri izləyicilərlə bölüşür:
“Hələ birinci Qarabağ savaşı zamanı atası Süleyman Mahmudov qazi olaraq geri dönüb. Babək XTQ-yə daxil olarkən atasına qisas alacağına söz verir. Şuşa fatehi polkovnik Tehran Mənsimovun dəvəti ilə XTQ-yə gəlib. “Mən şəhid olsam ağlama, ata”-deyərək atasına müraciət edir.
Manqa komandiri Babək Mahmudlu “İstiqlal” snayper kursunu da müvəffəqiyyətlə başa vurur. Naxçıvanda Türkiyə Cümhüriyyətinin və Azərbaycan Respubliasının keçirdiyi birgə hərbi təlimlərdə snayper atəşi yarışlarında birincilik əldə etmişdir.
27 sentyabr tarixindən torpaqlarımızın işğaldan azad olunması uğurunda mübarizədə Babəkin Cəbrayıldan başlayan döyüş yolu Zəngilana, Qubadlıyadək uzanır. Cəsur döyüşcü çətin döyüş əməliyyatlarının iştirakçısı olmaqla, 89 düşmən əsgərini “İstiqlal”ı ilə məhv etmişdir. Babək Mahmudlu Şuşa uğrunda gedən döyüşlərdə şəhid olmuşdur. 1 noyabr 2020-ci il tarixində doğulduğu Biləsuvar şəhərində torpağa tapşırılmışdır.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Babək Mahmudlu ölümündən sonra “Vətən uğrunda” medalı ilə təltif edildi.
Azərbaycanın Şuşa rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 29.12.2020-ci il tarixli Sərəncamına əsasən Babək Mahmudlu ölümündən sonra “Şuşanın azad olunmasına görə” medalı ilə təltif edildi.
Ruhu şad olsun!”
