Rusiyalı politoloq Qriqori Trofimçuk ermənilərin “Joxovurd” qəzetinə geniş müsahibə verib. Alp.az həmin müsahibədəki bəzi detalları oxucuların diqqətinə çatdırır.
Bu gün Brüsseldə Avropa İttifaqı Şurasının prezidenti Şarl Mişel Ermənistan və Azərbaycan liderləri ilə görüş keçirəcək. Bundan sonra bu gecə Ermənistanın baş naziri Nikol Paşinyan və Azərbaycan prezidenti İlham Əliyev danışıqlar masası arxasına əyləşəcəklər.
Xatırladaq ki, Paşinyan və Əliyev sonuncu dəfə noyabrın 26-da Moskvada Rusiya prezidenti Vladimir Putinin iştirakı ilə görüşüb. Görüşdən sonra üç ölkənin liderləri bəyanat yayaraq, 9 noyabr 2020-ci il və 11 yanvar 2021-ci il tarixli bəyanatların bütün müddəalarına daha da ardıcıl şəkildə əməl etməyə və qeyd-şərtsiz riayət etməyə sadiqliklərini təsdiqlədilər. Bundan əlavə, tərəflər Rusiyanın sülhməramlı missiyasının regionda vəziyyətin sabitləşdirilməsinə və təhlükəsizliyin təmin edilməsinə mühüm töhfəsini də qeyd ediblər.
Və beləliklə, Rusiya tərəfinin təşəbbüsü ilə keçirilən görüşdən sonra tərəflər bu dəfə Avropanın təşəbbüsü ilə görüşür.
Rusiyalı politoloq Qriqori Trofimçuk xüsusi gözləntiləri bu danışıqlarla əlaqələndirmir. Politoloq bildirib ki, istər qərb , istərsə Rusiya Qarabağı Azərbaycanın ərazisi hesab edir.
“Qərb tərəfdaşları Qarabağ münaqişəsinin həlli prosesini diplomatik və siyasi üsullarla dəstəkləyirlər. Aİ-nin bütün yüksək rütbəli siyasətçiləri, düzünü desək, zəif fiqurlardır, o cümlədən Brüssel danışıqlarının təşəbbüskarı Çarlz Mişel. Bütün işi Rusiya görür. Sözsüz ki, Rusiyanın rolu bu danışıqlarda qərbdən çox üstündür. Qarabağın açarı Rusiyanın əlindədir ”. -deyə politoloq bildirib.
