Rusiya İrəvanın Hindistandan aldığı hərbi texnikanın İran vasitəsilə Ermənistana gətirilməsinə mane olur. Bu barədə Ermənistan parlamentinin keçmiş deputatı Hayane Abramyan məlumat yayıb. Rusiya bu addımı niyə atır, silah satma rəqabətinə görə, yoxsa başqa səbəblər var?
Alp.az-ın məlumatına görə, hərbi-siyasi şərhçi Ramil Məmmədli “Bakı-Xəbər”ə açıqlamasında bildirdi ki, Rus silahının 44 günlük Vətən müharibəsində özünü doğrultmaması, həmçinin Ermənistanla Rusiya arasındakı soyuq münasibətlər onu digər bazarlar axtarmağa vadar edir: “Nəzərə alaq ki, 44 günlük müharibədə digər silahlarla yanaşı Ermənistanın hava hücumundan müdafiə sistemlərinin böyük hissəsi tərəfimizdən məhv edilib. Bunun yeri doldurulmalıdır. Ermənistan dövlətdirsə, müdafiə qabiliyyətini artırmaq üçün silah almalıdır. Ermənistanla Hindistan arasında silah ticarəti bundan sonra da olacaq. Bundan əlavə, Ermənistan elə bir gücə malik deyil ki, silahlanmasını Azərbaycandan üstün apara bilsin. Ermənistan hələ ki, itirdiyi silahların yerini doldurmaqla məşğul olacaq. Hindistan dünya silah bazarında daha çox alıcı ölkə kimi tanınır. Hindistan silah satan ölkələrin sıralamasında heç ilk 20-liyə daxil deyil. Bütün dünyada məlumdur ki, Hindistan silahları öz səviyyəsinə görə ABŞ, Avropa və Rusiyanın eyni növ silahlarından xeyli geridə qalır. Ermənistanın Hindistandan silah alması yeni hadisə deyil. Bunun da kökündə Ermənistanın çarəsizliyi dayanır. Çünki Ermənistana həm silah satan yoxdur, həm də silah satmaq istəyənlər bunu reallaşdıra bilmirlər. Rusiya İkinci Qarabağ müharibəsində və ondan sonrakı dövrlərdə silahları İran üzərindən rəsmi İrəvana çatdırır. Gürcüstan buna qətiyyən icazə vermir. Avropa ölkələri də İran üzərindən bu işi görmək istəmədikləri üçün oradan da silah almaq imkanı yoxdur.
Azərbaycan prezidenti İlham Əliyev də bunu Hindistan hakimiyyətinin qeyri-dost addımı kimi dəyərləndirib. Hindistandan alınan silahlar “yardım” hesab oluna bilməz. Çünki ermənilərə kifayət qədər yüksək qiymətə satılır. Azərbaycan dünyanın aparıcı silah satan ölkələrindən ən yaxşı silahları alır. Bunun üçün də geniş maliyyə imkanları var. Ona görə də 200-300 milyonluq aşağı keyfiyyətli silahın alınması erməni ordusunu gücləndirə bilməz, sadəcə daxili auditoriyanı bir qədər sakitləşdirə bilər. Bunu Ermənistan hakimiyyəti də yaxşı başa düşür və dərk edir ki, bu gün Azərbaycan Ordusu onlardan dəfələrlə üstündür”.
Ekspertin sözlərinə görə, fakt budur ki, Hindistan yüksək kompüter texnologiyaları sahəsində müasir məhsullar istehsal etməyə başlayan, böyük irəliləyişlərə malik olan, sürətlə inkişaf edən bir ölkədir: “Amma indi Hindistan tədricən hərbi-sənaye kompleksini inkişaf etdirir. Və bu səbəbdən Hindistan öz silahlarını satmaqla və silahlarını reklam etməklə qazanc əldə etməkdə çox maraqlıdır. Çünki hələ də Hindistanın öz silahı olmadığına dair (sahib olmadığı) fikirlər gəzir. Və əslində belədir. İndi Hindistan hamının silah istehsal etdiyini və hər kəsin bu müqavilələrdən xəbər bilməsini istəyir. Bu, məsələnin bir tərəfidir. Ermənistanın maliyyəsi olmadığını nəzərə alsaq, silahlar Fransa və ya Amerikanın pulları ilə alınır. Fransa və ABŞ istəmir ki, onların pulu Rusiya silahlarının alınmasına getsin. Məhz bu səbəbdən onlar Paşinyana qadağa qoyublar ki, Rusiyadan silah almasın. Başqa yerlərdən və Hindistandan silah almağa isə icazə veriblər. Rusiyanı da məhz bu amil narahat etdiyi səbəbindən prosesə bu yolla mane olmaq istəyir”.
Məhəmmədəli QƏRİBLİ (Bakı-Xəbər)
