Xüsusi Təyinatlı Qüvvələrimizin üzvü, düşmənin qorxulu röyası olan Cavid Hüseynovun şəhadətə qovuşmasından bir il ötür. Cavid 1993-cü ilin 12-ci ayının 12-ci günündə Tovuzun Alakol kəndində doğulub. 2012-ci ilin birinci ayından 2013-cü ilin yeddinci ayınadək həqiqi hərbi xidmət keçib.
Cavid 2014-cü ildə müddətdən artıq hərbi qulluq keçmə ilə bağlı müvafiq qaydada yazılı müraciət edib, müraciəti qəbul olunub. Öz taleyini hərbi xidmətə bağlayan, hərb sənətini sevən və bu sevgisini peşəkarlıq müstəvisində parlaq şəkildə gerçəkləşdirən Cavid çoxsaylı sertifikatlar alıb.
Müxtəlif silahlardan sərrast atəş açması ilə seçilib Cavid. Cavid snayper təlimatçısı olub; dəfələrlə “Ən yaxşı snayper” fəxri fərmanı ilə təltif edilib.
Snayperçilik, sərrast atıcılıq Caviddə fitri istedad idi.
2019-cu ildə yenidən Belarusda hərbi idman oyunları üzrə snayper yarışında 21 ölkə iştirakçısı arasında komanda hesabında 2-ci, fərdi yarışda 1-ci yeri tutub.
Cavid Hüseynov 26 iyun 2018-ci ildə “Azərbaycan Ordusu-100 (1918-2018)” yubiley medalı ilə təltif edilib (Bu medal Azərbaycan Prezidenti adından müdafiə naziri tərəfindən təqdim olunur).
“Biz bir ölüb, min dirilərik” – Cavidin sevdiyi, məktublarında qeyd etdiyi kəlamdı…
Cavid peşəkar snayper kimi ermənilərin qəniminə çevrilmişdi. Onun siyahısında 100-dən çox erməni leşi var idi…
Cavid qorxmaz, güclü Vətən oğullarından olub. Çox çətin təlimlərdən, məşqlərdən mətanətlə çıxmağı bacarıb Cavid. Təlimlərdə, məşqlərdə tər axıdan hərbçi yoldaşları ilə birgə işğalçılara qan uddura-uddura Qubadlı-Laçın istiqamətindək gedib çıxıb Cavid. Döyüşlərin birində yaralı tabor komandirini təhlükəli zonadan çıxartmaqla, necə deyərlər, adından söz etdirməyi bacaran Cavid özü sonrakı döyüşlərin birində düşmən mərmisindən ağır yaralınıb; döyüşçülər onu həkimə çatdırmaqçün çalışsa da, həyatını xilas etmək mümkün olmayıb – yolda canını tapşırıb…
Ailəsi ilə sonuncu dəfə Qubadlıda olarkən danışıbmış. “Şəhid olmasam qazi kimi gələcəm” deyirmiş igidimiz…
9 il hərbi xidmət yolu keçən Cavid Hüseynovu döyüş yoldaşları onu snayperçi kimi xatırlayır. Cavid ailədə tək oğlan övladı idi. Şəhidin atası Hümbət Hüseynov deyir ki, Cavidin ən çox istədiyi Xüsusi təyinatlılarda işləmək idi. Dostları isə deyir ki, Cavid Hüseynov məharətli snayperçi idi. O, snayper təlimatçısı olub, dəfələrlə “Ən yaxşı snayper” fəxri fərmanı ilə təltif edilib. Şəhidin atası deyir ki oğlunun yoxluğundan bir il ötsədə onun dostları Cavidin yoxluğunu hiss etdirmirlər.
Cavid Hüseynov işğalda olan ərazilərimizi qarış qarış gəzsədə sonda Füzuli istiqamətində gedən döyüşlərdə qəhrəmancasına şəhid olur. Şəhid Cavid Hüseynov ölümündən sonra “Vətən uğrunda”, “Kəlbəcərin azad olunmasına görə” və “Hərbi xidmətlərə görə” medalları ilə təltif olunub.
