Kremlin təbliğatçıları Rusiyanın hərbi cinayətlərinə görə cavabdehlik daşıyacaq.
Alp.az xəbər verir ki, bu barədə Ukrayna Prezidenti Vladimir Zelenski videomüraciətində bildirib.
O xatırladıb ki, dünən işğalçılar Mariupolda doğum evini və uşaq xəstəxanasını atəşə tutub, nəticədə 17 nəfər (qadınlar, uşaqlar, həkimlər – red.) yaralanıb, 3 nəfər ölüb (onlardan biri azyaşlı qızdır – red.).
Zelenskinin sözlərinə görə, bu, Rusiya televiziyasında da yayımlanıb: “Bu, onların tok-şousunda idi, amma bir söz demədilər. Ruslara yalan danışdılar ki, guya xəstəxanada xəstə yoxdur, doğum evində isə qadın və uşaq yoxdur. İddiaya görə, guya ora millətçilərin məskunlaşdığı yerdir. Onlar həmişə olduğu kimi arxayın şəkildə yalan danışırlar”.
Ukrayna dövlət başçısı vurğulayıb ki, müharibə cinayətləri onları ört-basdır edən təbliğatçılar olmadan mümkün deyil.
“Mən onlara bir şeyi demək istəyirəm: siz və mülki əhalinin bombalanması əmrini verənlərin hamısı eyni şəkildə cavab verəcəksiniz. Biz təbliğatçıların və onlarla əlaqəli şəxslərin bütün əmlakını tapacağıq. Harada olursa olsun, onun müsadirə olunması üçün hər şeyi edəcəyik. Zəngin həyatı sevirsiniz, elə deyilmi? Çiçəklənən ölkələri sevirsiniz? Artıq sizdə olmayacaq. Və bu yalnız başlanğıcdır. Siz müharibə cinayətlərində iştirak etdiyinizə görə mühakimə olunacaqsınız. Və bu, mütləq baş verəcək, Rusiya vətəndaşları sizə nifrət edəcəklər. İndi hər gün və uzun illər ard-arda aldatdığınız hər kəs yalanlarınızın nəticələrini anlayanda, bunu pul kisələrində hiss edəcəksiniz. Getdikcə azalan imkanlarınızda, rus uşaqlarının oğurlanmış gələcəyində hiss edəcəksiniz”, – Zelenski əlavə edib.
