“Yaxın günlərdə Xocalı kimi böyük faciənin 30 illiyi tamam olacaq”.
Bu sözləri Yenisabah.az-a açıqlamasında ehtiyatda olan polkovnik, hərbi ekspert Şair Ramaldanov deyib.
O bildirib ki, faciənin 30 illiyində sülhməramlılar Xocalı sakinlərinə öz dədə-baba yurdlarını ziyarət etmək üçün şərait yaratmalıdır:
“Məncə, bu, haqlı tələbdir. Biz Rusiyanın da Xocalı faciəsinə münasibətini bilirik. Artıq müharibə qurtarıbsa, Azərbaycan ərazi bütövlüyünü bərpa edibsə, Rusiyanın sülhməramlı qüvvələri heç olmasa, hörmət mənasında orada bir büst qoymalıydılar ki, bu qəsəbədə 30 il öncə soyqırımı olub və nəticədə 613 insan qətlə yetirilib. Bir ildən çox zaman keçib, lakin bunu hələ də etməyiblər”.
Ehtiyatda olan polkovnik etiraf edib ki, o, bir neçə dəfə bu fikirlə çıxış edib:
“Sülhməramlı qüvvələr Xocalının 30 illiyində Xocalı sakinlərinin oraya ziyarətini, hətta onların təhlükəsizliyini təmin edə biləcəklərmi və yaxud bunu istəyəcəklərmi? Yaxşı, indiyə qədər torpaqlarımız işğal altındaydı, vəziyyət başqa idi. İndi qələbə çalmışıq, ərazi bütövlüyümüzü bərpa etmişik, sülhməramlı qüvvələr razılığımızla orada yerləşib. Xocalının gözü yolda olan sakinləri niyə də 30 illiyi orada qeyd etməsinlər?!
İstərdim ki, bu olsun, istərdim ki, 30 illikdə Xocalı camaatı Xocalıya gedə bilsin. Axı Rusiyanın rəhbərləri Azərbaycana gələndə Şəhidlər Xiyabanına gedirlər, orada əkilil qoyurlar. Bizim rəsmilər də Rusiyaya gedəndə eyni addımı atırlar”, – deyə ekspert yekunlaşdırıb.
