Ukrayna prezidenti Vladimir Zelenski Amerika Yəhudi Komitəsinin Qlobal Forumunun iştirakçılarını Rusiyanın Ukraynada apardığı təcavüzkar müharibəsini dayandırmaq üçün səylərini artırmağa çağırıb.
Musavat.com xarici agentliklərə istinadən xəbər verir ki, bununla bağlı bazar ertəsi, prezident ofisinin mətbuat xidməti tərəfindən rəsmi məlumat yayılıb.
Forum iştirakçılarına videobağlantı vasitəsilə müraciət edən dövlət başçısı onlara qəti mövqe qoymalı olduqlarını bildirib. “Rusiya ordusunun Ukraynanın müvəqqəti işğal olunmuş ərazilərində həyata keçirdiyi qırğınlar, şəhərlərin dağıdılması, filtrasiya düşərgələri XXI əsrdə necə reallığa çevrilə bilər?”,-deyə V.Zelenski forumda iştirak edən hər kəsə belə bir sual ünvanlayıb.
Prezidentin sözlərinə görə, Rusiya yaşayış binalarına, xəstəxanalara və kilsələrə edilən bütün vəhşi hücumlara görə məsuliyyət daşımayacağını və cəzasız qalacağını güman edir.
Rusiyanın hələ ki, Ukraynaya, onun xalqına qarşı müharibəni davam etdirməyə, dünyanın reaksiyasına məhəl qoymayacaq qədər gücü var… Sizdən Rusiyanın bəşəriyyətə nifrətini dayandırmaq üçün səylərinizi ikiqat artırmağınızı xahiş edirəm. Bu nifrətdən aldığı güclə o, Ukraynaya və Avropada azadlığa qarşı müharibəni hələ də davam etdirir”,-deyə Ukrayna rəhbəri Kremlin ünvanına sərt ifadələr səsləndirib.
“Rusiya ordusu Ukraynada hətta rus kilsələrini də yandırır. Əsrlər boyu Ukraynada məskunlaşan yunan qromadalar (icmalar) məhv olunub. İşğal olunmuş yarımadadakı Krım tatarları repressiyalara məruz qalır. Rusiya raketləri Kiyevdə “Babin Yar”ı (1941-ci ildə Nasist Almaniyası tərəfindən Kiyev şəhəri yaxınlığında etnik yəhudilərə qarşı gercəkləşdirilmiş qətliamın xatirəsinə ucaldılmış abidələr) vurub. Rus artilleriyası Drobitsky Yarda Minor abidəsinə (yəhudi abidəsi) ciddi zərər verib. Rusiya XİN rəhbərinin açıq şəkildə antisemit bəyanatları dünya miqyasında qalmaqala səbəb olub”,-deyə Vladimir Zelenski fikirlərini bu nümunələrlə əsaslandırıb.
Ukrayna rəhbərinin fikrincə, bütün bunların qarşısını almağın yolu ölkəsinə çoxlu silah verilməsindən keçir. “İşğal olunmuş torpaqlarımızı azad etmək üçün bizə kömək edin. Bizə iri hücum silahları lazımdır. Bunsuz həm müharibə uzanacaq, həm də qurbanların sayı artacaq”,-deyə o bildirib.
