Ermənistanda Türkiyə ilə münasibətlərin düzəlməsi ilə bağlı danışıqlar prosesinin başlanması siyasi camedə ciddi müzakirələrə səbəb olub.
Alp.az erməni mediasına müsahibə verən “Voskanapat” analitik mərkəzinin rəhbəri, politoloq Hrant Melik-Şaxnazaryanla müsahibəni ixtisarla təqdim edir.
– Ermənistan və Türkiyə münasibətlərin normallaşmasına yönəlmiş dialoqa başlayır. Bu məqsədlə tərəflər xüsusi nümayəndələr təyin ediblər. Sizcə, bu prosesin sonunda Ankara və İrəvan hansı nəticələrə gələ bilər?
– Deməliyəm ki, Ermənistan və Türkiyənin hakimiyyət orqanları artıq iki ölkə arasında münasibətlərin qurulmasında ciddi irəliləyiş əldə ediblər. Hər halda prosesin əslində ictimaiyyətə göründüyü kimi getmədiyi göz qabağındadır. Əks halda, Türkiyə rəsmiləri ilə təmaslar barədə mütəmadi olaraq ortaya çıxan məlumatları təkzib edən Ermənistan hakimiyyətinin birdən-birə xarici işlər naziri Mövlud Çavuşoğlunun Ermənistanla münasibətlərin normallaşması və bu məsələyə xüsusi nümayəndə təyin edilməsi ilə bağlı bəyanatını belə böyük həvəslə qəbul etməsini necə şərh etmək olar. Bu məqsədlə və sözün əsl mənasında bir neçə gündən sonra Ruben Rubinyanı nümayəndə təyin etdi.
İndi vəziyyətimiz elədir ki, Türkiyə bizim xilas yolumuzdur. Bizim çətin vəziyyətdə olduğumuz bəllidir. İqtisadi vəziyyətimiz o qədər də yaxşı deyil. Amma şərtlərə diqqət etməliyik.
– Ermənistan Xarici İşlər Nazirliyi bəyan edib ki, Türkiyə ilə dialoq çərçivəsində parlamentin sədr müavini Ruben Rubinyan Ermənistanın xüsusi nümayəndəsi olacaq. Sizcə, o, buna uyğun namizəddirmi?
– Məncə, yeganə namizəd o idi. Və ya bir neçə nəfərdən biri. Başa düşürsünüz ki, Paşinyanın başqa yolu yoxdur? Kadrlarımız yoxdur. Yalnız bir faktı xatırlatmaq kifayətdir ki, müharibə başa çatdıqdan sonra Ermənistan hökumətinin başçısı aylar ərzində xarici işlər naziri vəzifəsinə vahid namizəd tapmadı. İndi də Ararat Mirzoyan beynəlxalq platformalarda Ermənistanın maraqlarını təmsil edir. İndi əgər Paşinyan baş nazir, Mirzoyan isə xarici işlər naziridirsə, Rubinyan Türkiyə ilə münasibətlərin normallaşması prosesində bizim xüsusi nümayəndəmiz olsun. İndi bu vəziyyətdən çıxış yollarını qapatmalı deyilik.
Tərcümə Alp.az
