Rusiyanın hər sahədə vəziyyətinin ağırlaşdığını dərk edən hərbi və siyasi elitanın nümayəndələri, eləcə də aşağı ranqlı şəxslər artıq məğlubiyyətin qaçılmaz olduğunu yəqin etdiklərindən, işlərini ehtiyatlı tutmağa, imkan daxilində məsuliyyətdən yayınmağa çalışırlar. Ötən həftə sonu bu baxımdan daha “zəngin” olub. Rusiyanın elit hərbi birləşmələrindən olan Pskov diviziyasının 100-dən artıq hərbçisi Ukraynaya getməkdən imtina edib. Onlara qarşı olan hədə-qorxulara, həbs olunma xəbərdarlığına baxmayaraq, hərbçilər və onların ailə üzvləri Ukraynada “ət maşınına” düşməkdənsə, həbsxananın daha yaxşı seçim olduğunu düşünürlər. Amma bu, hələ aşağı səviyyədə baş verən hadisədir. Siyasi elitada da “aradan çıxma” meylləri güclənib və faktiki olaraq Rusiyanı idarə edənlər batan gəmidən qaçmağa və postputin dövrünə hazırlaşmağa başlayıblar.
Ötən həftə məlumat vermişdim ki, daxili işlər naziri Vladimir Kolokoltsev Putindən istefa verməsini xahiş edib. Bu gün prezidentə səhər hesabatında Kolokoltsevdən yazılı müraciət daxil olub. Ümumiyyətlə, Putində Kolokoltsevin keçən həftə bu addıma hazırlaşdığı barədə məlumat olub, eyni zamanda, Kolokoltsev prezidentdən videobağlantı vasitəsilə görüş imkanı istəyib, lakin o, gərgin iş qrafikini əsas gətirərək rədd edilib və prezidentin nazirlə əlaqənin istəmədiyinə işarə edilib.
Əldə etdiyimiz məlumata görə, Putin çox güman ki, istefanı qəbul etməyəcək və bu ərizənin baxılmasını müharibə bitəndən sonrakı dövrə saxlayacaq. Müharibə başlamazdan əvvəl də Kolokoltsevin tərəddüdlü mövqeyi Nikolay Patruşevin şəxsi yardımı ilə güclənsə də, hərbi əməliyyatların başlaması ilə Patruşev Kolokoltsevə marağını itirib və o, dəstəksiz qalaraq, “istirahətə” göndərilənə qədər gözləməmək qərarına gəlib ki, onun bu mövqeyi də hadisələri düzgün qiymətləndirməsini göstərir.
Həmçinin, həftəsonu prezident Nikolay Patruşevlə danışıb və söhbət yenə onun oğlu, Rusiya Federasiyasının hazırkı kənd təsərrüfatı naziri Dmitri Patruşevin taleyi ilə bağlı olub. Xatırladaq ki, ötən həftə Dmitri də atası vasitəsilə istefa verməyi xahiş etmişdi. Nikolay Patruşev oğlunun istefasını və başqa iş sahəsinə keçməsini dəfələrlə xahiş etsə də, Putin bundan imtina edib. Bununla belə, prezident söz verib ki, Dmitri Patruşevin rəhbərlik etdiyi sahədə böhran vəziyyəti pisləşsə belə, prezident tərəfindən ona sanksiya tətbiq edilməyəcək.
Əldə etdiyimiz məlumatlara görə, Dmitri Patruşev nazirliyində dərin böhran yaranarsa, təkcə Putinin qəzəbindən deyil, həm də Putindən sonrakı dövrdə “günah keçisi”nə çevrilmək ehtimalından qorxur. Nazirliyin ekspertləri Rusiya Federasiyasının kənd təsərrüfatında bir ildən sonra güclü böhranın olacağını proqnozlaşdırırlar və Vladimir Putinin səhhəti barədə kifayət qədər məlumatlı olan Patruşevlər də bunu yaxşı bildiklərindən, gələn ilin postputin dövrünün başlanğıcı ola biləcəyini nəzərə alırlar.
Dadaş Əhmədli
