Sent-Vinsent və Qrenadinin Baş naziri məcburi peyvəndləməyə etiraz edənlərin atdığı ağır cisimlə başından ağır zərbə alıb.
Siyasətçi xəstəxanaya yerləşdirilib.Baş Nazirliyin ofisi onun “atıcı silah” dan yaralandığını bildirib. Yerli mətbuat isə bunun daş olduğunu düşünür. Maliyyə naziri bildirib ki, hökumət başçısı tibbi müayinədən keçmək üçün Barbadosa göndərilib. Yerli mətbuat polisin hücumda şübhəli bilinən bir qadını saxladığını yazıb.
Pandemiyanın başlanmasından bəri adada 2298 yoluxma hadisəsi və 12 ölüm faktı qeydə alınıb. Hal-hazırda əhalinin 9 faizinə yaxın peyvənd olunub. Ölkədə Rusiyanın istehsal etdiyi “Sputnik V” vaksini istifadə olunur.
Ümumiyyətlə, dünyada koronavirusa qarşı peyvəndə münasibət fərlqidir. Bir qrup peyvəndin təsirinə inanır, digər qrup isə bunu hansısa qlobal oyun hesab edir. Bir çox əleyhdarlar peyvəndin dünya əhalisini azaltmaq üçün istifadə olunduğu qənaətindədirlər. Hətta bir çox ölkədə buna qarşı olaraq etiraz aksiyaları da təşkil edilir.
Alp.az peyvənddən imtina edən şəxslərdən bəzilərini araşdırıb.
*Koronavirusa görə məhdudiyyətlərə qarşı çıxan “Tesla” korporasiyasının sahibi İlon Mask vaksinin əlçatan olmasından sonra peyvənd olunmaqdan imtina edib.
Biznesmen öz qərarını özünün və ailəsinin risk qrupuna aid olmaması ilə izah edib. Jurnalistlərdən biri “Tesla” korporasiyasının sahibinə virusdan ölüm hallarının sayının arta biləcəyini xatırlatdıqda Mask bildirib ki, hamı ölür. “Bütün bunlar (epidemiya vəziyyəti-red.) ümumiyyətlə, insanların irrasionallığına görə mənim bəşəriyyətə inamımı azaltdı”, – sahibkar deyib.
*İyul ayında koronavirus xəstəliyi keçirmiş Braziliya Prezidenti Jair Bolsonaru COVID-19-a qarşı peyvənd olunmaq niyyətində deyil.
Jair Bolsonaru bu barədə sosial şəbəkələrdə yayımlanan videomüraciətində deyib.
Prezident əlavə edib ki, bu, onun hüququdur və braziliyalılardan da məcburi vaksinasiyanı tələb etməyəcək. Jair Bolsonaru həmçinin qoruyucu maskanın effektivliyinə şübhə ilə yanaşdığını bildirib.
*Rusiyanın ÇSKA futbol klubunun bütün üzvləri koronavirusa qarşı peyvənd olunmaqdan boyun qaçırırılar.
Moskva klubunun inzibati işçiləri vaksin olunsalar da, futbolçular bunu etməyə tələsmir. Bu məsələ ilə bağlı açıqlama verən klub rəhbərliyi kollektiv qərardan söhbət getmədiyini, sadəcə bəzi oyunçuların peyvənddən imtina etdiyini qeyd edib.
Qeyd edək ki, Rusiyada bir çox sahələrdə peyvənd olunmaq məcburidir.
*ABŞ Hərbi Dəniz Qüvvələri əsgərlərinin 40 faizə yaxını koronvirusa qarşı peyvəndlənməyi rədd edib.
Dəniz Qüvvələrinin yaydığı məlumata görə, 75500 hərbçi peyvəndlənməyi qəbul edərkən, 48 minə yaxın əsgər bundan imtina edib. Eyni zamanda, 102 min əsgərin peyvənd olunmaq sırası hələ çatmayıb.
Şimali Karolina əyalətində Dəniz Qüvvələrinə aid Lejeun bazasında peyvənd olunmağı rədd edən əsgərlərin sayı çoxdur. Burada COVİD-19 peyvəndi etdirmə imkanı verilən 26400 əsgərdən 15100 nəfəri peyvənddən imtina edib. Bu da əsgərlərin 57 faizinin peyvənddən imtina etməsi anlamına gəlir.
*Bundan əlavə, Fransada, Almaniyada insanlar ötən ay məcburi peyvəndlənməyə etiraz etmişdi. Azərbaycanda da peyvənd könüllüdür və əleyhdarları var. cebhe.info
