“Rusiya Odessaya çıxmaqla Rumıniyadan Ukraynaya NATO-nun təchizat yollarını bağlamaq istəyir”.
Alp.az-ın məlumatına görə, bu fikri Yenicag.az-a açıqlamasında Rusiya və Ukraynada keçirilən əməliyyatların gedişini dəyərləndirən hərbi ekspert Ramil Məmmədli deyib.
Ramil Məmmədli bildirib ki, Rusiya istədiyi vaxt Ukraynanı Kurskdan çıxaracaq.
“Ukrayna ərazisində gedən əməliyyatları strateji siyasi manevr kimi də təqdim etmək olar. Rusiya 2022-ci ildə başlayan əməliyyatlardan sonra Ukrayna ərazisində hərbi əməliyyatlar keçirməsini əsaslandırmalı idi. Hərbi əməliyyatların Kursk istiqamətinə, yəni, Rusiya ərazisinə keçdikdən sonra bu məsələdə sərtlik nümayiş etdirir. Rusiya bütün dünyaya göstərir ki, onun da ərazisində əməliyyatlar gedir. Dolayısı ilə Ukrayna ərazisində Rusiyanın irəliləməsi, əraziləri işğal etməsi dünya mediasının gözündən kənarda qalıb. Daha çox diqqət Kurska yönəlib”, – deyə o əlavə edib.
Ekspert hesab edir ki, Ukraynanın Kurskdakı əməliyyatı hərbi taktiki baxımdan Rusiyanın əleyhinə olsa da, ancaq hərbi-siyasi, strateji və siyasi baxımdan Moskvanın xeyrinədir.
“Bundan sonra baş verəcəkləri Rusiya öz istədiyi formada əsaslandıra biləcək. Kurska daxil olmaq Ukrayna siyasi rəhbərliyinin yanlış addımı idi. Yaxşı olardı ki, Ukraynanın Kurskda əməliyyat keçirən bölmələri Xarkov, Donetsk istiqamətinə cəlb olunardı və torpaqlarını işğaldan azad edərdi”, – deyə o bildirib.
R.Məmmədli qeyd edib ki, hazrıkı vəziyyətdə doğru olduqları halda yanlış tərəfdə yer alıblar.
“Məsələni bilməyənlər “yaxşı oldu”, “Ukrayna düz elədi”, “Qoy, Rusiya görsün ki, onun ərazisinə də daxil olmaq olar” fikirlər səsləndirirlər. Bu diletant yanaşmadır. Azərbaycan təcrübəsini misal çəkmək olar. Azərbaycan ordusu Qarabağda əməliyyat apara-apara Ermənistan ərazisində Tovuz, Qazax, Gədəbəy istiqamətindən əməliyyat apara bilməzdimi? Hətta sərhəd toqquşması zamanı bütöv Göyçə mahalını da götürə bilərdi. Belə bir vəziyyətdə Azərbaycan ağır durma düşərdi və sanksiyalara məruz qalardı. Rusiyanın istədiyi vaxt Kurskdakı Ukrayna qoşunları ərazidən çıxarılacaq. Hələ ki Kurskdakı Ukrayna ordusunun çıxarılmasında maraqlı deyil. Kursk məsələsini şişirtməklə daha çox digər istiqamətlərdə əməliyyatlarını davam etdirir. Ehtimal odur ki, Rusiya uzun müddətdən bəri nail olmaq istədiyi mövqelərə çıxış əldə etməyə çalışacaq. Bu, Odessadır. Xarkov o qədər də əhəmiyyətli deyil. Rusiya Odessaya çıxmaqla Rumıniyadan Ukraynaya NATO-nun təchizat yollarını bağlamış olacaq. Kursk o zaman qədər Ukraynanın nəzarətində olacaq ki, Rusiya Ukraynada istədiyinə çatacaq”, – deyə o fikirlərini yekinlaşdırıb.
