“Mən bilmirəm, Müdafiə Nazirliyi niyə onları “qanunsuz” adlandırır, bu, işğalçı ordudur”.
Alp.az-ın məlumatına görə, bu sözləri Yenisabah.az-a açıqlamasında hərbi ekspert Ramil Məmmədli deyib.
O, Azərbaycan Silahlı Qüvvələri tərəfindən həyata keçirilən “Qisas” cavab əməliyyatından sonra yaranan suallara aydınlıq gətirib.
Onun sözlərinə görə, ümumiyyətlə, Qarabağdakı hazırkı taktiki və hərbi-strateji vəziyyət deyildiyi kimi deyil:
“Birincisi, Sarıbaba yüksəkliyi ermənilərin, Qırxqız dağının Laçına baxan hissəsi isə Azərbaycan ordusunu nəzarətində idi. Ermənilər yavaş-yavaş dağın zirvəsinə toplaşıb, orada mühəndis-istehkam bölmələri qurmuşdu. Bu, Azərbaycan ordusu üçün artıq problemə çevrilirdi. Silahlı Qüvvələrimiz bir neçə dəfə erməni hərbi birləşmələrinə həmin ərazini tərk etmək çağırışı etmişdi. Lakin onlar buna məhəl qoymamışdı və ərazidə artıq təmizləmə işlərinin aparılmasına ehtiyac duyulurdu”.
R. Məmmədli əlavə edib ki, erməni hərbi birləşmələri bu ərazidə təxribat əməliyyatları həyata keçirib:
“Onların müdafiə xəttini formalaşdırması artıq təxribat hərəkəti idi. Buna görə ordumuz antiterror əməliyyatı keçirmək məcburiyyətində qaldı.
O ki qaldı erməni hərbçilərinə “qanunsuz” deyilməsi məsələsinə, təbii ki, işğalçı ordu işğal etdiyi ərazidə qanuni ola bilməz. Amma həm Müdafiə Nazirliyi, həm də digər strukturlar bir az yanlışlıq yaradır. Məncə, bu, “qanunsuz” yerinə “işğalçı erməni hərbi birləşmələri” şəklində ifadə olunmalıdır. Çünki 2020-ci ilin 10 noyabrına qədər həmin əraziyə Ermənistan Müdafiə Nazirliyinin Birinci Əlahiddə Ümumqoşun Ordusu dislokasiya olunmuşdu. Müharibə bitdikdən sonra belə Ermənistan MN-nin Birinci Ordusu həmin ərazidə qalıb.
Bundan başqa, separatçı rəhbərlərə tabe olan hərbi birləşmələr var. Bu, Qarabağda yaşayan silahlı ermənilər və kənardan gətirilən muzdlu döyüşçülərdir. Silahlı Qüvvələrimizin keçirdiyi əməliyyatlar həm də Ermənistan ordusuna zərbə vurub”.
