Ordunu güclü edən həm də onun rabitə sistemidir. Ordu birləşmələrinin döyüş hazırlığı nə qədər güclü olsa da rabitəsiz hərbi bölmələrin uğurlu əməliyyat keçirməsi mümkün deyil. Demək, dövlətin güclü olması üçün onun onurğa sütunu olan rabitə sistemi də etibarlı və təhlükəsiz olmalıdır.
Məlumdur ki, Azərbaycan Ordusunun əsas rabitə vasitələri – sistemi Türkiyənin ASELSAN şirkətinə məxsusdur. Son illərdə Azərbaycanda iri layihələr əldə edən bu şirkət demək olar ki, silahlı qüvvələrin bütün istiqamətlərində öz fəaliyyətini qura bilib. Əlbəttə deyə bilərsiniz, Türkiyə və Azərbaycan strateji tərəfdaş ölkələrdir. Burada sual yaranacaq hansı məqam var ki?!
Bəli, var və bu narahatlığa dair çoxlu nümunələri dünya təcrübəsindən də misal çəkmək olar. Biri odur ki, dövlətlər arasında daimi dost və düşmən anlayışı yoxdur. İkincisi isə dövlət ordumuzun rabitə sisteminin milliləşdirilməsi üçün ciddi addımlar atmalıdır.
Azərbaycanın hərbi birləşmələri heç bir halda xarici ölkənin rabitə avadanlıqlarından asılı vəziyyətdə qalmamalıdır. Problemin detallarını uzun-uzadı yazmaq fikrim yoxdur. Sadəcə yaxşı olardı ki, hərbçilərimizin rabitə vasitəsilə danışıqları ancaq Azərbaycanda qalardı və NATO mənsublarının “qulağına” çatmazdı.
Bu istiqamətdə milli təhlükəsizliyimizdən cavabdeh olan tərəf həm də Müdafiə Sənayesi Nazirliyidir. Bu tipli rabitə avadanlıqlarının ölkəmizdə istehsalı məsələsi olduqca aktualdır.
Ramil Məmmədli
Hərbi ekspert
