Bu gün şəhid, Xüsusi Təyinatlı Qüvvələrin giziri Təhmasib Qarayevin doğum günüdür. Təhmasib 18 may 1996-cı ildə Ağcabədi rayon Kəbirli kəndində anadan olub. 2003-cü ildə M.Ə.Sabir adına Kəbirli kənd tam orta məktəbin birinci sinfinə daxil olub. Kiçik yaşlarından idmanla məşğul olub. Alp.az xəbər verir ki, Təhmasibin arzusu hərbiçi kimi vətənə xidmət etmək olsada, orta məktəbi bitirəndə bu arzunu reallaşdıra bilməyib. 2013-cü ildə Sumqayıt Dövlət Unversitetinin İqtisadiyyat və İdarəetmə fakultəsinə daxil olub. 2017-ci ildə həmin Unversiteti bitirdikdən sonra Xüsusi təyinatlı qüvvələdə xidmətə başlayıb. Xidməti bitirdikdən sonra yenidən kurslara qatılıb xidməti davam etdirərək Gizir rütbəsini alıb. Müharibə başlayan zaman yaxın dostuna, yaxın zamanda qayıdacam deyə söz verib. Təhmasib qayıtmağa söz versə də bu dəfə əhdinə sadiq olmayıb.
27 sentyabr 2020-ci ildə başlayan Vətən müharibəsində Murov yüksəkliklərinin, Cəbrayıl, Füzuli, Qubadlı rayonlarının azadlığı uğrunda iştirak edib. Çiyin-çiyinə döyüşdüyü hərbiçi yoldaşlarının dediyinə görə 22 oktyabr 2020-ci ildə Qırmızı bazar deyilən ərazidə gedən qızğın döyüşlər zamanı qəhrəmancasına şəhid olub. 23 oktyabr 2020-ci ildə Ağcabədi rayon Kəbirli kənd qəbirstanlığında dəfn olunub. Ölümündən sonra Cəbrayıl, Kəlbəcər və Vətən uğrunda medalları ilə təltif olunub.
Allah rəhmət eləsin!
