Məlum olduğu kimi, son vaxtlar erməni təxribatları intensivləşməyə başlayıb.
Bu gün də düşmən gecə saatlarından başlayaraq Kəlbəcər rayonunun Zəylik və Yellicə yaşayış məntəqələrində yerləşən mövqelərimizi atəşə tutub.
Bəs ermənilərin təxribatı hansı məqsədi güdür? Hazırda prosesə yanaşma necə olmalıdır? Anti-terror əməliyyatının keçirilməsinə start verilməlidirmi?
Məsələ ilə bağlı politoloq Qabil Hüseynli bildirib ki, ordumuz anti-terror əməliyyatlarına hazırdır və bu istiqamətdə hazırlıqlar da gedir:
“Məsələnin diplomatik, siyasi tərəfləri var ki, ilk növbədə Moskva ilə danışıqlara girmək lazımdır. Çünki Ermənistanla birbaşa danışıqlar praktikası yoxdur. Rusiyanın bu məsləyə münasibətini öyrəndikdən sonra öz yolumuzu müəyyənləşdirməliyik. Yəni, sülh yaratmaq prosesi demək olar ki, yerində sayır. Ermənistan isə bu məsələlərə heç reaksiyada vermir. Eyni zamanda, bəzi dövlətlər ATƏT-in Minsk qrupunu məsələyə qoşmaq istəyirlər. Rusiya isə çəkilib öz yuvasına və kimlərinsə ona müraciət etməsini gözləyir. Düşünürəm ki, 2-3 günə Azərbaycan tərəfi siyasi danışıqlar praktikasını yenidən nəzərdən keçirərək özünün son addımlarını müəyyənləşdirəcək”.
Məsələ ilə bağlı Xəzər Müdafiə Tədqiqatları Mərkəzinin rəhbəri, hərbi şərhçi Ramil Məmmədli açıqlamasında bildirib ki, burada təkcə Ermənistanın deyil, həm də Rusiyanın çox ciddi maraqları var:
“2020-ci il 10 noyabr tarixli bəyanat imzalandıqdan sonra ötən bir il ərzində demək olar hər ay bir neçə dəfə, bəzən isə bütün həftə boyu Ermənistan hərbi birləşmələri Azərbaycan ordusunun postlarına hücumlar edib, təxribatlar hazırlayıblar. Bu hallar davamlı olaraq düşmən tərəfindən həyata keçirilir. Şuşanın işğaldan azad olunması, yəni Zəfər günündən bir neçə gün əvvəl Ermənistanın Müdafiə naziri Qarabağa qanunsuz olaraq səfər edir və orda yerləşən Ermənistan Müdafiə Nazirliyinin Əlahiddə ordusunun hərbi hissələrinə baş çəkir, döyüş hazırlığını yoxlayır, ön xəttə olur. Ardınca isə vəziyyət bir qədər də dəyişir və Şuşa yaxınlığında azərbaycanlı hərbçilərin postuna piyadalar əleyhinə əl qumbarası atılır. Həmin şəxsi Rusiya sülhməramlıları saxlayır, daha sonra isə Ermənistana təhvil verir. Ermənistan tərəfi isə bu proseslərə qətiyyən reaksiya vermir və ümumiyyətlə, məsələlərlə bağlı danışmaq istəmir.
Burada təkcə Ermənistanın deyil, həm də Rusiyanın çox ciddi maraqları var. Rusiya “dırnaqarası sülhməramlı” kontingentinin orada qalma müddətinin uzadılması məqsədilə ümumi gərginliyə rəvac verən addımlar atır. Əgər bu günə qədər ermənilər gizli olaraq Azərbaycanın hərbi postlarına atəş açırdılarsa, indi artıq açıq şəkildə, kameraların gözü qarşısında Azərbaycan hərbçilərinin üzərinə əl qumbarası atılır. Burada birinci sülhməramlıların müddətinin uzadılması, ikinci Qarabağdakı ermənilərə hər hansı bir hüquqi statusun əldə olunması məqsədi daşıyır”.
Hərbi şərhçi qeyd edib ki, bu təxribatlar Azərbaycanı yeni müharibəyə cəlb etmək üçün həyata keçirilir:
“Burada günahkar tərəf Ermənistanla yanaşı həm də Rusiyadır. Çünki Qarabağda hələ də erməni silahlı birləşmələri mövcuddur. Qeyd etdiyim kimi, Ermənistan Müdafiə Nazirliyinin Əlahiddə ordusu da orada xidmət aparır, onların heç biri tərksilah edilməyib. Məhz bu amillər vəziyyəti daha da gərginləşdirir”.Bakupost.az
