2022-ci ildə Azərbaycanda “ADEX-2022” beynəlxalq müdafiə sənayesi sərgisi keçiriləcək.
“Expoclub”un verdiyi məlumata əsasən, sərgi 6-8 sentyabr 2022-ci il tarixlərində baş tutacaq. Sərgidə Türkiyədən 44, həmçinin İsrail və Rusiyadan 14 şirkətin də iştirakı təmin ediləcək.
Sərgidə “Aselsan”, “CETC”, “Damen”, “MBDA”, “Norinco”, IAI, “Roketsan”, “Rosoboronexport”, “Thales” və başqa tanınmış şirkətlərin hərbi texnikalarının nümayiş etdirilməsi gözlənilir.
Qeyd edilib ki, sərgi “Baku Expo Mərkəzi”ndə təşkil ediləcək və hərbi müdafiə komplekslərinin müxtəlif sahələr üzrə müasir müdafiə texnologiyaları və nümunələri, dünya silah bazarına ixracı təklif olunan hərbi texnikanın son inkişafı ilə tanış olmaq imkanı yaradacaqı.
Sərginin keçirilməsində məqsəd hərbi-texniki əməkdaşlığın gücləndirilməsi, xarici tərəfdaşlıq dairəsini genişləndirmək, Azərbaycan və xarici hərbi texnika istehsalçılarının son nailiyyətlərinin nümayişi, dünyanın hər yerindən hərbi texnika istehsalçıları və müştəriləri arasında işgüzar əlaqələrin inkişafı, Azərbaycanın müdafiə sənayesinin nailiyyətlərinin və potensialının yerli və beynəlxalq ictimaiyyətə nümayişini təşkil edir.
Cebhe.info-ya açıqlamasında hərbi ekspert Ədalət Verdiyev bildirib ki, bu sərgidə daha çox ölkənin iştirakı gözlənilir:
“Gələn il Azərbaycanda növbəti “Adex-2022”sərgisi müharibədəki qələbədən sonra həyata keçirilən ilk sərgi kimi tarixə düşəcək.
Hələlik iştirak edəcək ölkələri siyahısı tam məlum olmasa da, əvvəlki sərgilərin təcrübəsi göstərir ki, Türkiyə, İsrail, Ukrayna, Belarus, Rusiya, Fransa, Pakistan, İran, Çin və İtaliya kimi dövlətlər daha çox maraq göstərir. Son sərgidə 29 ölkədən 224 şirkət iştirak etmişdi”.
Ə.Verdiyevin sözlərinə görə, sərgidə Azərbaycan “İtiqovan” PUA-sının bir üst versiyasını nümayiş etdirə bilər:
“Budəfəki sərgidə Azərbaycan Müdafiə Sənayesi Nazirliyinin “İtiqovan” PUA-sının modernləşdirilmiş versiyasını, bir çox atıcı silahları, iriçaplı hücum və snayper tüfənglərini görə biləcəyik. Əvvəlki sərgilərdə nümayiş edilmiş eksperimental taktiki raket “ETR-M” adlanan 2-3 min metrlik raketin də bu sərgidə hazır və kütləvi istehsalına keçmiş versiyasını görəcəyik. Sərgidə Azərbaycan şirkətlərindən “VİTTA” şirkəti də olacaq. Bundan əvvəlki sərgidə Milli Elmlər Akademyasının Texnologiya Parkı uzaqdan mina partladan sistemlərini təqdim etmişdi. Bu sərgidə onun bir üst versiyasını görə bilərik”.
