ABŞ-ın, Avropa ölkələrinin və Çinin silah istehsalçısı və satışı şirkətləri özünün canlanma dövrünü yaşayır.
Alp.az alman jurnalı “FOCUS”da dərc olunan yazını təqdim edir:
Müəllif yazır ki, bir müddət əvvələ qədər aparılan təhlillərdə Avropanın silah istehsalçısı və ixracatçısı şirkətlərinin fəaliyyətində perspektivin olmadığı bildirilirdi. Bu gün isə müdafiə sənayesi şirkətlərinin səhimlərinin qiymətləri görünməz dərəcədə yüksəlib. Bu isə o deməkdir ki, Avropada dinc dövr başa çatıb və onların zamanı gəlib.
Həm silah biznesi canlanır, həm də müdafiə sənayesi müəssisələri ABŞ-da olduğu kimi hətta Almaniyada belə üç növbədə çalışır. Hətta soyuq müharibəyə hazırlıq dövrü üçün də silah istehsalı – satışı ilə bağlı sifarişlər qəbul olunur. Bu sənaye müəssisələrinin səhimdarları və menecerləri zənginləşir.
Qlobal hərbi xərclər təkcə silahlara deyil, texniki xidmət və şəxsi heyətin məsrəfləri üçün 2021-ci ildə ilk dəfə olaraq 2 trilyon dolları ötüb.
Müəllif hesab edir ki, hərbi sənaye ayrıca dövlət olsaydı, o zaman reytinqdə 9-cu yerdə olardı – İtaliyadan bir qədər aşağıda, Kanadadan bir qədər yuxarıda.
Stokholm Sülh Araşdırmaları İnstitutunun (SIPRI) ekspertləri isə hesab edirlər ki, 2022-ci ildə qlobal silah ticarətinin hesabatlarında nəzərəçarpacaq artım müşahidə olunacaq. Çünki Ukrayna dünya ölkələrindən böyük miqdarda silah alır və bu da müdafiə sənayesi müəssisələrinin tam gücü ilə işləməsinə səbəb olub. Hətta mövcud vəziyyəti dünyada yeni silah istehsalı yarışı da hesab etmək olar.
“2022-ci ilin oktyabr ayına qədər ABŞ Ukraynaya dörd illik istehsal həcminə uyğun gələn 8500 “Javelin” tank əleyhinə raket kompleksi tədarük edib” – SIPRI hesabatında deyilir. Bu, yalnız bir nümunədir.
Müəllif sonda qeyd edir ki, bütün dünyada şüurda inqilabi proseslər gedir. Təbii ki, hadisələrin dönüşü təhlükəsizliyimizə xidmət edəcəkdir. “Sülh istəyirsənsə, müharibəyə hazırlaş”, hərbi strateqlər həmişə belə deyirlər.
Ancaq digər tərəfdən, müharibəyə hazırlaşan hər kəs həqiqətən də hə dəfə sülh istəmir.