Rusiya sülhməramlılarının kölgəsində gizlənən erməni silahlılarına qarşı sərt cəza tədbirləri başlana bilər; bölgədəki quldurları himayə edən rus hərbçilərin hərbi təlimləri kimə qarşı yönəlib-anormallıq; polkovnik: “Azərbaycanın sərhəddə və Qarağda kifayət qədər gücü və imkanları var ki, qısa bir zaman kəsiyində lazım olan qayda-qanunu bərpa etsin”
Avqustun 30-da müdafiə naziri general-polkovnik Zakir Həsənovun rəhbərliyi ilə Mərkəzi Komanda Məntəqəsində xidməti müşavirə keçirilib.
Müdafiə Nazirliyindən verilən məlumata görə, müşavirəyə nazir müavinləri, qoşun növləri komandanları, nazirliyin baş idarə, idarə və xidmət rəisləri, eləcə də videobağlantı vasitəsilə azad edilmiş ərazilərdə dislokasiya olunan hərbi birlik və birləşmələrin komandirləri, o cümlədən digər məsul zabitlər də cəlb olunub.
Prezident, Silahlı Qüvvələrin Ali Baş Komandanı cənab İlham Əliyevin Azərbaycan Ordusu qarşısında qoyduğu tapşırıqları müşavirə iştirakçılarına çatdıran müdafiə naziri bildirib ki, Azərbaycan Ordusunda aparılan islahatlar bundan sonra da davam etdiriləcək.
Müdafiə naziri Türkiyənin milli müdafiə naziri və baş qərargah rəisini, o cümlədən qəhrəman Türk əsgərini 30 avqust – Türkiyənin Zəfər Bayramı və Silahlı Qüvvələr Günü münasibətilə təbrik edib.
Ermənistan-Azərbaycan dövlət sərhədində və Rusiya sülhməramlı kontingentinin müvəqqəti yerləşdiyi Azərbaycan Respublikasının ərazilərində vəziyyəti təhlil edən müdafiə naziri qarşı tərəfin təxribat fəaliyyətinə dərhal adekvat cavabın verilməsi, qoşunların döyüş qabiliyyətinin və şəxsi heyətin döyüş hazırlığının daim yüksək səviyyədə saxlanılması məqsədilə bölmələrin və idarəetmə məntəqələrinin fəaliyyətinin praktiki məşq etdirilməsi, döyüş planlarının dəqiqləşdirilməsi, həmçinin maddi-texniki təminat məsələlərinə xüsusi diqqət yetirilməsi ilə bağlı tapşırıqlar verib.
Azərbaycan Ordusunda planlaşdırılan tədbirlərə toxunan general-polkovnik Z.Həsənov azad edilmiş ərazilərdəki bölmələrdə qoşun xidmətinin təşkili, ərazilərin mina və partlamamış döyüş sursatlarından təmizlənməsi, hərbi infrastrukturun yaradılması, dağ yolların çəkilməsi və onların daim işlək vəziyyətdə saxlanılması, bölmələrin qışa hazırlığının təmin edilməsi ilə bağlı müvafiq göstərişlər verib. Nazir nizam-intizam və təhlükəsizlik, o cümlədən yanğın təhlükəsizliyi qaydalarına riayət olunması, eləcə də hərbi qulluqçuların tibbi təminatının daha da yaxşılaşdırılmasına xüsusi diqqət yetirilməsinin vacibliyini bildirib.
Bu arada Rusiya Müdafiə Nazirliyi Azərbaycan ərazilərində yerləşdirilmiş sülhməramlı kontingentin növbəti döyüş təlimləri ilə bağlı məlumat yayıb. Məlumatda deyilir ki, sülhməramlılar “şərti düşmənin pilotsuz aviasiyadan istifadə edilməklə mümkün pozuntularının qarşısının alınması və Laçın dəhlizi boyu müşahidə postlarında təhlükəsizliyin təmin edilməsi” üzrə məşq keçiblər. Məşğələlərin 6 təlim məntəqəsində keçirildiyi bildirilir. “Təlim zamanı hərbi qulluqçular yeni taktiki fəndlər və yerləşmə ərazisindən çıxış zamanı yeni fəaliyyətlər icra ediblər. Bundan əlavə, şərti pozucunun blokadaya alınması və təyin olunmuş hüdudlara ərazinin relyefindən istifadə etməklə gizlicə manevr edərək çıxış məşq edilib”, – məlumatda deyilir. Bildirilir ki, indiki təlimlərin xüsusiyyətləri müşahidə postunun məsuliyyət zonasında pilotsuz uçan aparatın aşkar edilməsi vəzifələrinin yerinə yetirilməsi olub. PUA aşkar edilməsi barədə məlumat qapalı rabitə kanalları ilə Rusiya sülhməramlı kontingentinin idarəetmə mərkəzinə ötürülüb. Sülhməramlı kontingentin nümayəndəsi Vladislav Vorobyov bildirib ki, şəxsi heyət zirehli texnikanın dəstəyi ilə döyüş mövqeləri tutub, mövqelərə hərəkət edib. “Məşğələlər praktiki fəaliyyətlərin icra olunduğu kompleks məşqlərlə tamamlanıb”, – o bildirib. Qeyd edək ki, Rusiya sülhməramlı kontingenti vaxtaşırı olaraq bu cür təlimlər keçirirlər. İndiki təlimlər isə Gorus-Qafan yolunun Azərbaycan ərazisindən keçən hissələrinin sərhədçimizə edilmiş hücumun ardınca bağlanmasından (hazırda yol açılıb) sonraya təsadüf edir. Həmin günlərdə erməni KİV-ləri yazmışdılar ki, Laçın dəhlizi boyu Rusiya sülhməramlıları gücləndirilmiş növbətçilik həyata keçirirlər və az qala hər kilometrdən bir patrullar yerləşdirilib. Eləcə də sosial şəbəkələrin erməni seqmentində vaxtaşırı olaraq Azərbaycanın Laçın dəhlizini bağlayacağı haqda şaiyələr yayılır və bu da erməniləri təşvişə salır.
Bəzi ekspertlər hesab edirlər ki, “sülhməramlı” adlanan hərbçilərin müvəqqəti yerləşdiyi ərazilərdə xüsusilə Laçın dəhlizi magistralında silahlı erməni birləşmələrinin postlarının qoyulması Azərbaycana təzyiqir. Politoloq Məhəmməd Əsədullazadənin sözlərinə görə, Rusiya hərbiçilərinin dəhliz boyu PUA və zirehli texnikalara qarşı təlimlərinin hədəfi də şərti olaraq Azərbaycan hərbiçiləridir: “Rusiya Qarabağda silahlı erməni birləşmələrininin Azərbaycana qarşı silahlı təxribatlarına bir neçə aydır ki, rəvac verir. Artıq müdafiə naziri Zakir Həsənov sülhməramlı qüvvələrin nəzarətində olan ərazidə erməni silahlı birləşmələrinə qarşı ciddi tədbirlərin görülməsini əmr verdi. Azərbaycan Qarabağda silahlı erməni birləşmələrinin ovuna çıxacaq. Bir neçə gündür qeyd edirəm ki, Azərbaycan qanunsuz erməni silahlı birləşmələrinə qarşı hərbi əməliyyatlar keçirəcəksə, Rusiya sülhməramlı qüvvələri Azərbaycan hərbiçilərinə atəş aça bilməz. Nəhayət ki, müdafiə naziri hərəkətə keçməyi əmr etdi. Azərbaycan 10 noyabr Birgə Bəyannaməsinin 4-cü bəndinə uyğun olaraq diplomatik danışıqlarla silahlı erməni birləşmələrinin çıxarılmasına nail ola bilmədi. Hazırda təzyiqlər yolu ilə bu məsələni bitirəcək. Çünki silahlı erməni birləşmələri Qarabağda qaldıqca, Füzuli-Şuşa yolu və Şuşa şəhəri daima atəş altına ola bilər”.
Hərbi ekspert, ehtiyatda olan polkovnik Üzeyir Cəfərov bildirdi ki, Müdafiə Nazirliyinin son müşavirəsinə ilk baxışdan adi müşavirələrdən biri kimi yanaşmaq olar: “Həm avqust ayının yekunu, həm də həftəlik yekun toplanışlarından biri idi. Amma bu müşavirənin bir ən önəmli və əsas məqamlarından biri kimi, məncə, ölkə rəhbərliyinin nazir Zakir Həsənov, o cümlədən Dövlət Sərhəd Xidmətinin (DSX) rəhbər heyəti qarşısında qoyduğu çox ciddi və sərt tələblərlə bağlı idi. Bu, son vaxtlar erməni yaramazların rus sülhməramlılarının arxasında namərdcəsinə gizlənərək mövqelərimizə atəş açması və təxribatların davam etməsidir. Bütün baş verənlərin fonunda rusların bu özbaşınalıqlara göz yumması və digər amillər artıq dözülməz həddə çatmışdı. Ona görə də həm Müdafiə Nazirliyinin, həm də DSX-nin rəhbərləri müvafiq tapşırıqları və göstərişləri qoşunların komandanlarına veriblər”. Polkovnik qeyd etdi ki, bu haqda Rusiya tərəfi də məlumatlandırılıb: “Daha bundan sonra Rusiya sülhməramlıların müvəqqəti məskunlaşdıqları ərazilərdən belə atəş açılarsa, Azərbaycan Ordusuna və Silahlı Qüvvələrimizin bütün şəxsi heyətinə adekvat addımlarım atılması əmri verilib. İndiyə kimi bir qədər səbr və dözüm nümayiş etdirən əsgərlərimiz bundan sonra yerindəcə və anındaca cavab tədbirləri həyata keçirəcəklər. Necə deyərlər, deyəsən, ruslar və orada qalan erməni tör-töküntüləri bir qədər arxayınlaşmışdılar ki, bizim şəxsi heyət susqunluq nümayiş etdirəcək. Hətta bir qədər ciddi məqamlar da var. Qısaca olaraq onu deyim ki, rus sülhməramlılarının komandiri general Rüstəm Muradov da bundan sonra Azərbaycan tərəfinin bəzi loyal və yumşaq addımlarına ümid edə bilməyəcək. Rusların saxta xəritə oyunları, həmçinin 10 noyabr 2020-ci il tarixli bəyannamədən irəli gələn ən əsas və vacib məsələni hələ də həll etməmələri bizimkiləri də artıq ciddi addımlar atmağa sövq edib”. Ü.Cəfərovun fikrincə, bunu çoxdan etmək lazım idi: “Bir qədər qudurğanlıq və özündənrazılıq hissləri həm sülhməramlı adı ilə bölgəyə müvəqqəti dəvət etdiyimiz rusları, həm də onların çox isti münasibəti ilə tula kimi arxada hoqqalar çıxaran erməniləri bir qədər şirnikləndirmişdi. Hesab edirəm ki, yaxın həftələrdə biz bır sıra ciddi toqquşmaların və münasibətlərin gərginləşməsinin şahidi olacağıq. Amma bu, çox da uzun çəkməyəcək. Düşünürəm ki, rəsmi Moskva da baş verənlərin bundan sonra belə davam edə bilməyəcəyini nəhayət ki, gec də olsa anlamalıdır və anlayacaq. Sərhəddə və Qarağda Azərbaycanın kifayət qədər gücü və imkanları var ki, qısa bir zaman kəsiyində lazım olan qayda-qanunu bərpa etsin. Amma rus-erməni hoqqabazları istəmirlər ki, regionda tezliklə sabitlik və əmin-amanlıq bərqərar olsun. Onlar çalışırdılar ki, vəziyyəti daha da mürəkkəbləşdirsinlər. Bizim də səbrimizin bir həddi var deyə, müdafiə naziri, həmçinin bildiyim qədər bunu açıq elan etməsələr də, DSX rəhbərliyi lazım olan göstərişləri artıq verdilər”.
Polkovnik qeyd etdi ki, indi söz ruslarındır: “Onlar ya üzərinə düşəni yaxın həftələrdə yerinə yetirəcəklər, ya da missiyanın 1 illiyi ərəfəsində onlar Azərbaycan rəsmilərindən və ictimaiyyətindən özləri üçün o qədər də xoş olmayan sözlər və təkliflər eşitməli olacaqlar. Vaxt daralır və Rusiya siyasi-hərbi rəhbərliyi baş verənləri doğru-düzgün təhlil edib nəticə çıxara bilsə, hər halda, zədələnmiş nüfuzlarının azca da olsa bərpası üçün cüzi sayıla biləcək addım atmış hesab olunacaqlar. Təkrar da olsa, deməliyəm ki, rusların bu sülhməramlı misiyaları ən uğursuz və məsuliyyətsiz bir missiya kimi tarixdə qalacaq”.
QAT sədri Akif Nağı isə bildirdi ki, ermənilər yenə də qırmızı cizgiləri keçirlər: “Başa düşmürlər ki, bununla sonlarını yaxınlaşdırırlar. Azərbaycan məcbur olub son zərbəni endirəcək. Bu zərbədən sonra ermənilərin regionda izi-tozu da qalmayacaq. Ermənilər sakitləşmir, təxribatlar törədir, rusların qanadı altında gizlənib, bizim tərəfə atəş də açırlar. Mən burada Rusiya sülhməramlıları deyil, ”ruslar” ifadəsini təsadüfən işlətmədim. Biz nə qədər çalışsaq da ki, Rusiya hakimiyyəti ilə, Jirinovski, Solovyov kimi sarsaqlarla rus xalqı eyniləşdirilməsin, dəyərli rus ziyalıları, siyasiləri, ictimai xadimləri nəzərə alınsın, ictimai rəy rus xalqına qarşı yönəlir, Azərbaycan xalqı büyövlükdə rusları ittiham edir. Ona görə də Rusiya hakimiyyəti bunu nəzərə almalı, xalqımızın içərisində haqlı antirus əhvalının yumşalmasına çalışmalıdır”. A.Nağı bir məqamı da xüsusi vurğuladı: “Biz 30 il Rusiyanın himayəsi altında olan Ermənistanın cinayətlərinə dözdük. İndi ruslar himayədən imtina etməli, onların üstündən qanadını çəkməlidir. Yoxsa qanadın altında olanları qanadın özü ilə birlikdə məhv edəcəyik! Qarabağdakı ermənilər bir neçə gündən sonra ”müstəqillik” oyunlarına başlayacaqlar. Azərbaycan onların istənilən cəhdinin qarşısını sərt şəkildə almalı, ruslardan onların təxribatlarına imkan verməməyi tələb etməlidir!” QAT sədri dedi ki, nazir Zakir Həsənovun çıxışı müsbət qatşılanmalıdır: “Ordimuz bu açıqlamaya uyğun olaraq ermənilərin istənilən təxribatının qarşısını güc tətbiqi ilə almalıdır. Bu addımlar həm də antiterror əməliyyatına hazırlıq mərhələsə olmalıdır. Antiterror əməliyyatı artıq qaçılmaz reallığa çevrilir”.
Rus hərbçilərin kölgəsində gizlənən erməni quldurlar açıq-aşkar həyasızlıq edirlər. Elə Azərbaycan vətəndaşının keçmiş Ağdərə rayonu ərazisində oğurlanması və onun qanunsuz olaraq “mühakimə edilməsi” də bu həyaszılığın növbəti təzahürüdür. Erməni canilər bu yolla Bakıya təzyiq göstərəcəklərini, erməni terrorçularının azadlığına nail olacaqlarını zənn edirlər. Amma anlamaq istəmirlər ki, antiterror əməliyyatlarını saatbasaat yaxınlaşdırırlar, özlərinə qəbir qazırlar. Nazirin verdiyi əmr də bunun anonsudur. Gözləyək…“Yeni Müsavat”
