Ukrayna prezidenti Volodimir Zelenskiy Rusiyanın bir sıra müstəqil KİV nümayəndələri ilə videokonfrans formatında görüş keçirib və onların suallarını cavablandırıb.
Alp.Az xəbər verir ki, Zelenskiy jurnalistlərin “Hərbi texnikaların üzərində “Z” hərfi sizin kənarlaşdırılmanızı nəzərdə tuturmu?” sualına belə cavab verib: “Ola bilər, amma mənim siyasi olaraq kənarlaşdırmam üçün işlər əvvəldən gedirdi. İlk əvvəl regionlarda güclənməyə, mərkəzi hakimiyyəti zəiflətməyə çalışdılar. Bunu tam bacarmadıqda isə fiziki kənarlaşdırmaq üçün müəyyən addımlar atmağa başladılar. Tamamilə xaos yaratmaq üçün, ölkə rəhbərliyini kənarlaşdırmaq lazımdır. Ya siyasi, ya da fiziki mənada”.
V.Zelenskiy bildirib ki, Rusiya ilə danışıqlarda “denafisikasiya” və “demilitarizasiya” barədə bəndlərin üzərindən “xətt çəkib”. Ukrayna prezidenti bu mövzularda heç danışmaq da istəmədiyini vurğulayıb: “Təhlükəsizliyə təminat isə Rusiya üçün olduğu qədər, bizim üçün də lazımdır. Amma bizə maraqlıdır ki, bizim təhlükəsizliyimizə kim zəmanət verəcək”.
Zelenskiy rus dili məsələsinə də toxunub: “Mən rus dilinə qarşı hər hansı məhdudiyyətin əleyhinəyəm. Özüm də bəzən rus dilinə keçirəm. Bizdə hər kəs istədiyi kimi danışır. Ümumiyyətlə, bütün qonşularımızla dil məsələsində razılığa gəlmək istəyirəm – amma qarşılıqlı şəkildə. Siz bizdə məktəb açırsınız, biz də sizdə. Ukraynada milli azlıqlar çoxdur. Başqa ölkələrdə də çox ukraynalı yaşayır. Lakin təəssüflə qeyd etmək istəyirəm ki, rus dilinə normal münasibəti olan adamlar belə, Rusiyanın ölkəmizə soxulmasından sonra az qala rus dilinə nifrət edir”.
O, sülhməramlıların gəlişi ilə bağlı da danışıb: “Hələ müharibə başlamamışdan əvvəl, mənim ideyam var idi ki, atom elektrik stansiyalarının ərazisində sülhməramlılar olsun, orda təhlükəsizliyə nəzarət eləsin. İndi Polşa tərəfdən təklif var ki, Ukrayna ərazisinə sülhməramlılar gəlsin. Mən bunu indiki halda qətiyyən qəbul etmirəm. Bizə
“dondurulmuş” münaqişə deyil. Nə qədər ki, mən prezidentəm, nə qədər ki, ərazilərimiz işğaldadır, buna imkan verməyəcəm”.
Zelenskiy guya Ukraynanın Donbass və Krıma hücum edəcəyi barədə açıqlanan sənədlərə də aydınlıq gətirib: “Bu sənədlər yüz faiz saxtadır. Milli Qvardiyanın sabiq komandirinin imzası olan sənəd yayılıb. Əvvəla, bu yalandır, ikincisi də ki, o adamın buna səlahiyyəti çatmayıb. O birləşmə Daxili İşlər Nazirliyinə tabedir. Krıma hücum barədə, Solovyovun yaydığı sənəd də saxtadır. Sənəddə hər şey ukraynca yazılıb, amma mənim inisallarım V.A.Zelenskiy kimi qeyd olunub. Ukrayna dilində mənim inisallarım V.O.Zelenskiydir. Mən güc yolu ilə həlli nəzərdən keçirmirdim. Bilirdim ki, bu, minlərlə itki deməkdir. Hətta o torpaqlar bizim olsa da. Rusiya bizim ərazimizə qoşun yeridib, baxın, 20 minə yaxın itkisi var. Heç bir müdaxilə barədə biz düşünmürdük. Öz adamlarımıza heyfimiz gəlir”.
Alp.Az oxucular üçün qeyd edir ki, Ukrayna prezidentinin tam adı Volodimir Oleksandroviç Zelenskiy olaraq yazılır. Yəni, rus dilində Vladimir və Aleksandr adları Ukraynanın dövlət dilində Volodimir və Oleksandr olaraq yazılmalıdır.
Rüfət
Alp.Az
