O, dünyanın bəlkə də ən bəxti gətirən insanıdır. Bəli söhbət ABŞ vətəndaşı Billi Heysdən gedir.
Billi Heys 1970-ci ildə, 23 yaşlı tələbə ikən Türkiyəyə səfər edir və buradan qayıdanda 4 funt həşiş (təxminən 1,8 kq) çıxarmaq istəyərkən yaxalanır. Ona əvvəlcə narkotik maddələrin saxlanılması ittihamı ilə 4 il 2 ay həbs cəzası verilir. Cəzasını Sultanəhməd cəza evində olduqca ağır şəraitdə keçirir. Həbs müddətinin bitməsinə az qalmış isə ona elan edilir ki, cəzası qaçaqmalçılıq ittihamı ilə ömürlük həbslə əvəz olunub. Heys çox güman ki, o zaman ABŞ və Türkiyə arasında yaşanan “xaşxaş böhranı”nın qurbanı olur. 1975-ci ildə amnistiya nəticəsində cəzası 30 illə əvəz olunur və o, İmralı adasında yerləşən həbsxanaya keçirilir. Heys 1975-ci il oktyabrın 2-də buradan qaça və dəniz vasitəsilə Yunanıstana keçə bilir. Yunanlar da 2 həftə sorğu-suala tutduqdan sonra amerikalılara təhvil verirlər.
Ölkəsinə qayıdan Heys başına gələnlər haqqında “Gecəyarı ekspresi” adlı kitab yazır və həmin kitab əsasında 1978-ci ildə eyni adlı film çəkilir. Heysin rolunu Bred Devis oynayır. Filmi daha həyəcanlı etmək üçün rejissor Alan Parker və ssenarist Oliver Stoun Türkiyə həbsxanalarını kitabda olduğundan daha dəhşətli təsvir edirlər. Onların uydurduqları səhnələr arasında Heysin həbsdən qaçmazdan öncə onu zorlamaq istəyən Həmid adlı nəzarətçini öldürməsi var. Halbuki özünün qəddarlığı ilə seçilən həmin nəzarətçini hələ 1973-cü ildə başqa bir keçmiş dustaq azadlığa çıxandan sonra öldürüb. Həmid onu döyərkən ailəsini də söyürmüş.
Billi Heys verdiyi müsahibələrdə dəfələrlə deyib ki, film çox şişirdilib və bütün türklərin mənfi təsvir olunmasından təəssüfünü bildirib. 2007-ci ildə Türkiyəyə gələn Billi Heys “kitaba görə deyil, kitab əsasında çəkilən filmə görə” türk xalqından üzr istəyir.
Sultanəhməd cəza evi isə indi Four Seasons Hotel kimi fəaliyyət göstərir.
Yadigar Sadıqlı
