“Qalarasaray”ın baş məşqçisi Fatih Terimin klubdakı gələcəyi qeyri-müəyyən olaraq qalır.
Mayın 31-də müqaviləsi başa çatacaq 67 yaşlı mütəxəssis komanda ilə vidalaşaraq Bodruma getməzdən əvvəl klub rəhbərliyinə 5 maddəlik hesabat təqdim edib. O, hesabatda komandaya 5 mövqedə transferlər edilməli olduğunu bildirib. Terimin fikrinə əsasən, İstanbul təmsilçisi müqaviləsi yayda bitəcək Marselo Saraççi və Emre Taşdemirin yerinə sol cinah müdafiəçisi almalıdır. O, sağ cinah müdafiəçiləri Martin Linnes və Şener Özbayrakın da sözləşməsinin sona çatmasını nəzərə alaraq bu mövqelərə də yeni oyunçuların alınmalı olduğunu vurğulayıb. Həmçinin Terim “Qalatasaray”ın mərkəz müdafiəçisi, yarımmüdafiəçi və hücumçu transfer etməli olduğunu düşünür.
Qeyd edək ki, türk çalışdırıcının klubla yeni müqavilə imzalayıb-imzalamayacağı iyunda keçiriləcək prezident seçkilərindən sonra məlum olacaq.
