Stanislav Kurilov uşaq vaxtlarından üzməyi yaxşı bacarırdı. 10 yaşında İrtış çayını üzüb keçmişdi. O, hərbi xidmətdən sonra Leninqrad hidrometeoroloji institutunu okeanologiya ixtisası üzrə bitirir. Kurilov müxtəlif okeanları tədqiq etmək arzusunda idi, amma SSRİ-də ölkədən çıxmaq üçün çıxış vizası tələb olunurdu. Kurilov isə bütün cəhdlərinə baxmayaraq, çıxış vizası ala bilmir. Güman olunur ki, onun bacısı bir hindliyə ərə gedib Kanadada yaşadığı üçün Stanislavın da qayıtmayacağı ehtimal edilirdi. Halbuki onun özünün dediyinə görə, heç vaxt qayıtmamaq fikri olmayıb. Amma viza müraciətlərinə aldığı imtina cavabları onu ölkədən qaçmağa sövq edir.
Kurilov 1974-cü ilin sonlarında qəzetdə bir kruiz elanına rast gəlir. “Sovetskiy Soyuz” sərnişin gəmisi Vladivostokdan ekvatora qədər gedib qayıdacaqdı. Bu zaman gəmi heç bir xarici ölkə limanına girməyəcəyindən, sərnişinlər üçün çıxış vizası tələb olunmurdu. Gəminin marşrutunu öyrənən Kurilov quruya ən yaxın olacağı vaxtı təxmin edir və həmin vaxt gəmidən qaçmağı qərara alır. O, üzgüçülük məharəti ilə yanaşı uzun illər məşğul olduğu yoqaya da ümid edirdi.
Kruiz dekabrın 8-də başladı. Dekabrın 13-də Stanislav üzgüçülük eynəyi və lastları geyinərək 12 metr hündürlükdən okeana tullandı və Filippin sahillərinə tərəf üzməyə başladı. Onun hesablamalarına görə 18 km üzməli idi. Amma naviqasiyasada buraxdığı səhvdənmi, yoxsa su axınına görəmi, okeanda 3 sutka keçirir və təxminən 100 km üzür. Nəhayət, Filippinin Siarqao adasına çıxır. O, burada 6 ay saxlanıldıqdan və xüsusi xidmət oranları tərəfindən dindirildikdən sonra Kanadaya gedə bilir.
Kurilovun qaçışı Qərb mətbuatında manşetə çevrildi. SSRİ-də “Vətənə xəyanət” ittihamı ilə qiyabi olaraq 10 il həbsə məhkum olundu. Onun “Qaçış” povesti bir neçə dildə çap olundu.
Stanislav 1986-cı ildən İsraildə məskunlaşdı. İsrail vətəndaşı ilə evləndi. Sakit okeanda 3 sutka keçirən adam 1998-ci ildə 61 yaşında Təbəriyyə gölündə bədbəxt hadisə nəticəsində həlak oldu. O, dayvinq zamanı balıqçı toruna ilişdi və azad ola bilmədi. Balondakı bütün oksigeni istifadə edəndən sonra boğuldu.
Yadigar Sadıqlı
