UEFA İngiltərə yığmasına qarşı intizam işi açıb. Söhbət Danimarka ilə yarımfinal matçından gedir.
Alp.az UEFA-nın rəsmi saytına istinadən xəbər verir ki, Avropa futbol assosiyasiyaları birliyi ingilislərin əlavə vaxtdakı penaltisini araşdırır.
Deyilənə görə, 11 metrlik cərimə zərbəsi zamanı Danimarkanın qapıçısı Kasper Şmeyxelin gözünə lazer şüalar salınıb. Bundan başqa, UEFA ingilis azərkeşlərin pirotexniki vasitələrdən istifadəsi və onların Danimarka himni səslənən zamankı davranışları barədə də iş görür.
Qeyd edək ki, ingilislər Şmeyxel penalı dəf edəndən sonra Harri Keynin qayıdan topu tora yollaması ilə qələbə qazanıblar.
Oyunun nəticələri ləğv olunmasa, iyulun 11-i saat 23:00-da İtaliya və İngiltərə çempion olmaq üçün mübarizə aparacaqlar.
Bu final bitəndən təxminən 2 saat sonra isə Braziliya və Argentina Amerika kubokunun finalında qalibi müəyyənləşdirəcəklər.
