Ermənistana səfər edən İngiltərə vətəndaşı dünən tvitterdə Qərbi Zəngəzurun Qarakilsə (Ermənistan SSR Ali Sovetinin Rəyasət Heyətinin 1940-cı ildəki fərmanı ilə adı dəyişdirilərək Sisyan qoyulub) rayonunun Urud (Ermənistan SSR Ali Soveti Rəyasət Heyətinin 1968-ci ildəki fərmanı ilə adı dəyişdirilərək Vorotan adlandırılıb) kəndindən fotolar paylaşıb.
Fotoları sosial şəbəkədə paylaşan Elməddin Behbud ermənilərin barbarlığının bir daha sübut olunduğunu qeyd edib.
“Şəkillərdən aydın görünür ki, kəndin qəbiristanlığı dağıdılıb, məzardaşları aşırılıb və sındırılıb. Bu məzarlarda uyuyanların hər birinin əcdadı yüzillər boyu bu torpaqlarda – doğma yurdlarında yaşayıblar. Elə onların özləri də yaşadıqları və ətraf kəndlərin ictimai, mədəni həyatının aparıcı şəxsləri olublar. Yerli türk əhalinin sonuncu nümayəndələrinin 1988-ci ildə Zəngəzurdan deportasiya olunmasından sonra isə bu torpaqlarda yalnız yadellilər – ermənilər qalıb. Özlərinə saxta tarix uyduran, vaxtı ilə onlara rəhbərlik və sahiblik edən, onlarla çörəklərini bölüşən türk əhalinin hətta məzarlarına da dözümsüzlük nümayiş etdirən və nəhayət Vətən müharibəsindən sonra 30 illik avantüralarının, xəyallarının heç olduğu nankor ermənilər…
Yalnız 5 yaşlı uşağın göz yaddaşındakı təsvirlərə deyil, həm də genetik yaddaşıma söykənərək inanıram ki, biz o torpaqlara yenidən dönəcəyik!
Həsrətlə, nisgillə, ömrünün ən gözəl çağlarını keçirdikləri doğma torpaqları bir daha görməyərək həyatdan köçən ata-anamın, babalarımın, nənələrimin, çoxsaylı yaxınlarımın və minlərlə soydaşımızın ruhuna dualaraq oxuyaraq əzəli yurdalarımıza qayıdacağıq. Onda yalnız Qarakilsənin Qızılcıq, Ərəfsə, Comərdli, Sofulu, Vağadi, Urud, Ağdü, Dəstəyurd, Şəki, Şıxlar, Murxuz kəndlərinin məzarlıqlarındakı həmvətənlərimizin deyil, bütün əcdadlarımızın ruhu şad olacaq.
Allah qərib ellərdə uyuyan bütün azərbaycanlılara rəhmət eləsin!”
