Türkiyə Futbol Federasiyasının prezidenti Nihat Özdəmir və milli komandanın məşqçisi Şenol Günəş dünən Rivada bir araya gəlib.
Alp.Az xəbər verir ki, hər kəsin maraqla gözlədiyi görüşdən sonra rəsmi açıqlama verilməyib. Günəş və Özdemirin bu gün yenidən görüşəcəyi və yekun qərar veriləcəyi bildirilir.
Bununla belə, dünənki toplantının təfərrüatları bəlli olub. “Skorer” nəşri görüşün pərdəarxası detallarını təqdim edib:
Şenol Günəşin TFF rəhbərinə “Uğursuzluq varsa, bu məndən qaynaqlanır. Veriləcək hər bir qərara hörmətlə yanaşacağam. Türk futbolu üçün faydalı olacaq hər bir addımı ataram. İstəsəniz, istefamı verə bilərəm. İstəyirsinizsə, siz azad edin” dediyi öyrənilib.
“Bəli, son Hollandiya oyunu üçün heyət seçimində səhv etdim. Məsələn, Orkunun yerinə Ozan Tufanla başlaya bilərdim. Ancaq Ozan karantindən yeni çıxmışdı və çox məşq etməmişdi. Durumunu tam bilmədiyimiz üçün belə bir qərar verdik. Bunda yanıla bilərəm. Hamısını qəbul edirəm.
Burada prioritet nə mənəm, nə də məni əvəz edəcək hansısa məşqçi. Prioritet yenə də Dünya Kubokunun finalına çıxmaq şansı olan milli komandadır. Onun üçün nə etməliyik? Şübhəsiz ki, çətin vəziyyətdir. Bir daha deyirəm ki, hər qərara hörmətlə yanaşıram. Çox gənc, həyəcanlı və hər zaman uğur qazanmaq istəyən və buna görə də zaman zaman səhvlər edən bir komandamız var. İnanın, bu gənclər böyük uğurlara imza atacaqlar.
Hollandiya matçında tribunalardan gələn etirazlara, sizə olan reaksiyalara görə özümdən daha çox üzgünəm. Nəvənizin yanında olarkən belə bir vəziyyətlə üzləşməyiniz məni daha çox incitdi. Çünki siz onlara heç layiq deyildiniz.
Məqsədim Dünya Kubokundan sonra vəzifəni başqasına həvalə etmək idi. Əslində bu istiqamətdə hazırlıqlarım da var idi. Bəzi adları özüm hazırlamaq istəyirdim. Amma bu bir “klub oyunudur”. Altayı oynayıram, “Trabzonspor”lular ayağa qalxır. Uğurcan heyətdə yer alır, bu dəfə “Fənərbaxça” camiəsi reaksiya verir. Bu qədər zərərli azarkeşlərin, idarəçilərin və medianın olduğu bir mühitdə, bu uşaqları milli damı altında bir araya gətirmək özlüyündə çətin bir işdir”.
İdarə heyətinin başçısı Nihat Özdəmir isə yığıncaqda “Ciddi bir uğursuzluq var. Bütün Türkiyəni narahat edən və heç birimizin gözləmədiyimiz bir nəticə ortaya çıxdı. Qarşıda bizi 4 matç gözləyir və vaxtımız azdır. Sizinlə davam edib-etməyəcəyimlə bağlı idarə heyətimlə bir görüş keçirəcəyəm. Fikirlərini öyrəndikdən sonra yenidən görüşəcəyik. İnanıram ki, nə sizə, nə də türk futboluna zərər verəcək bir addım atmadan bir yol xəritəsi təyin edəcəyik. Doğru qərarı verəcəyik” deyib.fanat.az
