Ukraynadan atasına zəng edən rus hərbçinin Çeçenistan veteranı olan atası ilə telefon danışığı dinləyənləri dəhşətə gətirir.
Alp.Az xəbər verir ki, səs yazısı Ukrayna daxili işlər nazirinin müşaviri Anton Geraşenko tərəfindən “Youtube” platformasına yerləşdirilib.
Səs yazısından məlum olur ki, rus hərbçisi ön cəbhədədir və artıq hücumdan söz getmir – onlar bir qədər də sağ qalmaq üçün müdafiəyə çəkiliblər.
Oğulun atası ilə telefon danışığının qısa məzmunu belədir: “Sən Çeçenistanda olarkən, elə olurdu ki, hər nəfəsini son nəfəsin kimi hiss edirdin? Amma burda elədir. Burda çox fərqli düşünməyə başlayırsan. Ayrı cür… Əllər-ayaqlar havada uçur. Heç bilirsən nə qədər meyit var, “Kamaz”a nə qədər cəsəd yükləmişəm? Tonlarla araq içirəm, amma kömək eləmir. Biz bura niyə gəldik? Əgər Rusiyaya hücum eləsəydilər, mən ayağa qalxıb hamıya sipər olardım. Amma biz niyə bura gəldik? Putin bizi bura niyə göndərdi? Onlar da insandır, rusca danışırlar, bizim keçmiş qardaşlarımızdırlar. Bütün bunlar nəyə görə idi, anlaya bilmirəm”.
Oğul artıq əmindir ki, yaxın günlərdə onun da sonu gələcək: “Ata, müqaviləli hərbçilər üçün pul ödəməlidirlər. O pulu götürüb borclarımı verərsən”.
Qeyd edək ki, Anton Geraşenko bu cür səs yazılarından kanalına onlarla yükləyib. Səs yazılarının bir çoxunda rus qadınları müharibədə olan övladları və ərlərindən evə qızıl-gümüş, bahalı əşyalar, xəz palto və hətta mikser gətirməyi xahiş edirlər.
Rüfət Əhmədzadə
Alp.Az
Rüfət
