“Human Rights Watch” (“HRW”) adlı insan HAQSIZLARI təşkilatının bizə qarşı hiddət doğuran, həyasız münasibətini gördük. Sanki 44 günlük müharibə Ermənistanın ərazisində gedibmiş, Qarabağ da Ermənistan imiş və Azərbaycan sən demə, özü özünə təcavüz edibmiş. Sırtıqlığın, böhtanın bu qədəri yəni.
Hələ az öncə ABŞ Konqresinin qəbul elədiyi və bu günlərdə Baydenin imzaladığı, bəndlərinin birində Vətən müharibəsinə görə Türkiyə və Azərbaycan əleyhinə dəhşətli iftiraların, hətta sanksiya təhdidlərinin yer aldığı fitnəkar qanun. Beynəlxalq erməni çevrələrinə bağlı, erməni lobbisinin çörəyi ilə qidalanan bu üzdəniraq “insan haqları” təşkilatları, şər-böhtan üyüdən amerikalı konqresmenlər və nə yazıq ki, həm də qoca Bayden halal qələbəmizi heç cür həzm edə bilmirlər. Yuxuları qaçıb, bağırları çatlayır.
Hələ çox çatlayacaq. Bizə isə nə qədər çətin olsa da, hirsimizi boğmaq, səbir eləmək düşər. Bir də güclənmək, güclənmək və güclənmək!! Hərbi cəhətcə, iqtisadi cəhətcə, diplomatik cəhətcə! Demokratik yöndə! Qardaş Türkiyə ilə düşmənlərin acığına bir qədər də “ət-dırnaq” kimi olmaq!! Daxili birliyimizi, vəhdətimizi göz bəbəyi kimi qorumaq, üstündə əsmək!
Çünki azca zəifləyən kimi, dağınıq və pərakəndə düşən kimi, inanın, üstümüzə yırtıcı sürüsü kimi və daha azğın şəkildə, daha əcaib iddialar və tələblərlə gələcəklər. ABŞ-dakı Massaçusets Texnologiya İnstitutunun (MİT) “professoru”, İsveç-Amerika əsilli Marks Teqmak kimi. Türk xalqının böyük oğlu Selcuq Bayraktar haqda görün o nə çərənləyib: “Səlcuq Bayraktara təhsil verdiyimiz üçün utanıram”.
Utanmaq üçün utanan üz lazımdır. Səlcuq bəy də onun kimilərin cavabını qəşəng verib, şillə kimi tutuzdurub: “Adını ilk dəfə eşitdiyim və özünü “professor” sayan bir MİT əməkdaşı Qarabağ müharibəsi dövründə deyib ki, Səlcuq Bayraktara burda təhsil verdiyimiz üçün utanıram. Utanmalı olan törətdiyiniz kütləvi qətilamlar və soyqırımıdır. Biz torpaqlarımızı geri aldıq və bununla yalnız qürur duyuruq”.
Əlbəttə ki, Səlcuq bəy Amerikadakı aborigen hindu əhalisinin soyqırımını, ABŞ qoşunlarının Vyetnamda, İraqda, Suriyada, Əfqanıstanda, dünyanın bir çox digər yerlərində törətdikləri çoxsaylı qətliamlara işarə edir. Elə təkcə nüvə silahı bəhanəsi ilə İraqa necə soxulduqlarını yada salmaq yetər. Bunlar istənilən ölkəyə heç kimi saya salmadan təcavüz edə bilərlər, biz isə öz qanuni torpaqlarımızı silah gücünə azad edə, vəhşiləşmiş, insanlıqdan çıxmış işğalçını ərazimizdən qova bilmərik! Gərək Qərbdən, “HRW” kimi geydirmə təşkilatlardan, ABŞ konqresmenlərindən, teqmaklardan icazə alarmışıq…
Ancaq olan oldu artıq. Xalq olaraq sözümüzü gec də olsa dedik, sərt üzümüzü göstərdik, təcavüzkarı necə lazımdı cəzalandırdıq, gücümüzü, birliyimizi dünyaya göstərdik. Ermənistanın və havadarlarının dərsini verdik. İndən belə Qarabağın daha sürətlə qalxınması və bərpası qayğısına qalmalı, köçkünlərimizi daha sürətlə öz yurd yerlərinə qaytarmalıyıq. Qarabağımızı daha sürətlə cənnət məkana çevirməliyik ki, ürəkləri bir az da partlasın, havalansınlar, dilləri tutulsun və bir daha yalan danışa, böhtan ata bilməsinlər. Onlara ən böyük cəza elə bu olacaq!..
Nəhayət, Minsk Qrupu adlı tragikomik, absurd qurumun baş qaldırmasına əsla imkan verməməliyik. Necə ki, vermirik və ermənilərə satılmış bu qurumu bilmirlər necə reanimasiya edib bizə qarşı ondan təzədən təzyiq aləti kimi yararlansınlar.
Elə “ədalətli” vasitəçilərin, elə “ədalətli” Qərbin belə də “insan haqları” təşkilatı olar! “Dəyər” həmənkidir. Odur ki, biz də öz dəyərimizdə qalaq!..musavat.com
Zahid SƏFƏROĞLU
